हामी सबैकाे संसारन्यूज

२४ साउन, काठमाडौँ । त्रिभुवन विश्वविद्यालयले हाल सञ्चालन भैरहका ५ गतेसम्मका परीक्षा जारी राख्ने निर्णय गरेको छ । कोभिड-१९ संक्रमण बढेको भन्दै शनिबार राष्ट्रिय परीक्षा बोर्डले कक्षा १२ को परीक्षा स्थगित गरेपनि त्रिभुवन विश्वविद्यालयले भने तालिका प्रकाशित गरिसकेका परीक्षाहरू नरोक्ने निर्णय गरेको हो ।

आइतबार बसेको त्रिवि परीक्षा सुधार तथा समन्वय समिति र प्राविधिक परिषदको बैठकले भदौ ५ गतेसम्मका परीक्षा नरोक्ने निर्णय गरेको त्रिवि परीक्षा नियन्त्रण कार्यालयका प्रमुख तथा परीक्षा नियन्त्रक पुष्पराज जोशीले गरिएको बताए । उनले हाल सञ्चालन भइरहेको परीक्षामा विद्यार्थी संख्या थोरै भएकाले स्वास्थ्य मापदण्ड पालना गरेर परीक्षा सञ्चालन गर्ने निर्णय बैठकले गरेको जानकारी दिए ।

त्रिविले सञ्चालन गरिरहेका वार्षिक परीक्षाहरु साउन २९ गते र सेमेष्टर प्रणालीका परीक्षाहरु भदौ ५ गते सकिँदैछ । कोभिडको संक्रमण बढीरहेको भन्दै बोर्डले साउन ३१ देखि संचालन हुने भनिएको कक्षा १२ को परीक्षा स्थगित गरेको छ । त्रिविका परीक्षाहरु पनि बन्द गरिनु पर्ने आवाजहरु पनि उठिरहेका छन् ।