हामी सबैकाे संसारन्यूज

२५ साउन, पोखरा । कोरोना संक्रमणबाट गण्डकी प्रदेशमा सोमवार थप ५ जनाको मृत्यु भएको छ ।

प्रदेशको स्वास्थ्य निर्देशनालयका अनुसार मृत्यु हुनेमा म्याग्दी, लमजुङ, तनहुँ, स्याङ्जा र नवलपरासी पूर्वका १÷१ जना रहेका छन् ।
सोमवार थपिएका ५ जनासँगै प्रदेशमा हालसम्म ज्यान गुमाउनेको संख्या १ हजार १४१ पुगेको छ ।

त्यस्तै प्रदेशमा सोमवार मुस्ताङमा १, म्याग्दीमा ७, पर्बतमा ५, गोरखामा ४९, लमजुङमा ६३, तनहुँमा १३, कास्कीमा १९६, वाग्लुङमा ६०, स्याङजामा ८६ र नवलपरासीपूर्वमा ९८ जना गरी ५७७ जना नयाँ संक्रमित थपिएका छन् । ती मध्ये २८७ जना महिला र २९० जना पुरुष रहेका छन् ।

निर्देशनालयद्धारा जारी विवरण अनुसार सोमवार थपिएका संक्रमितमध्ये सबैभन्दा बढी कास्कीमा १९६ जना रहेका छन् ।

सोमवार थपिएका ५७७ जनासँगै प्रदेशमा हालसम्म ७२ हजार ६२८ जनामा कोरोना संक्रमण पुष्टि भएको छ भने ती मध्ये ६५ हजार ५९१ जना निको भइसकेका छन् । सोमवार ४२७ जना संक्रमणबाट मुक्त भएका हुन् ।

निर्देशनालयका अनुसार प्रदेशमा हाल ५ हजार ८९६ सक्रिय संक्रमित रहेका छन् । ती मध्ये होम आइसोलेशनमा ५ हजार ६६१ जना रहेका छन् भने अन्यको विभिन्न अस्पताल तथा संस्थागत आइसोलेशन सेन्टरमा उपचार भइरहेको छ ।