हामी सबैकाे संसारन्यूज

साउन २९, काठमाडौं । गठबन्धनलाई सघाएको भन्दै लुम्बिनी प्रदेश सरकारमा विनाविभागिय मन्त्री बनेका अजय शाहीलाई एमालेले स्पष्टीकरण सोधेको छ । एमालेको प्रदेश संसदीय दलले सांसद अजय शाहीलाई स्पष्टीकरण सोधेको हो।

हृदयेश त्रिपाठी नेतृत्वको स्वतन्त्र राजनीतिक समूहमा रहेका शाही चार दलीय गठबन्धनमा सामेल हुँदै बिहीबार विनाविभागीय मन्त्री नियुक्त भएका थिए । उनले एमालेको साथ छाडेपछि एमाले संसदीय दलले तीन दिनभित्र आफैं उपस्थित भई स्पष्टीकरण दिन भनेको हो ।

एमालेको संसदीय दलका प्रमुख सचेतक भूमिश्वर ढकालको हस्ताक्षरमा सोधिएको स्पष्टीकरण पत्रमा शाहीले असार ३० गते बजेट पारित गर्ने दिन प्रदेश सभामा अनुपस्थित भई पार्टीको ह्वीप उल्लंघन गरेको र साउन २७ गते प्रदेश सभा बैठक बहिस्कार गर्ने पार्टी निर्णय विपरीत बैठकमा उपस्थित भएको उल्लेख छ । तीन दिन भित्र चित्तबुझ्दो जवाफ नआए कारबाही प्रकृया अघि बढाइने पत्रमा उल्लेख छ ।

‘२०७८ श्रावण २७ गते असंवैधानिक हिसाबले सविधानको भावना र मर्म विपरित प्रदेश प्रमुखले प्रदेश सभाको बैठक समावेदन गर्न र त्यसमा प्रदेश सरकार मुख्यमन्त्री मा। शंकर पोखरेलका विरुद्धमा अविश्वास प्रस्ताव टेबुल गर्ने बैठकमा अनुपस्थित हुने दलको निर्णय र ह्वीप उल्यन गरी बैठकमा किन भाग लिनु भयो। सरकारको विरुद्धमा ल्याएको अविश्वासको पक्षमा किन हस्ताक्षर गर्नु भयो ?’, पत्रमा सोधिएको छ ।

शाहीले भने आफू सूर्य चिन्हबाट चुनाव जिते पनि स्वतन्त्र सांसद भएको बताएका छन् । ‘म स्वतन्त्र सांसद हुँ, मलाई एमालेले कारबाही गर्न मिल्दैन, गर्यो भने अदालत जान्छु,’ शाहीले भनेका छन् ।