Sansar News
भदौ ६, काठमाडौं । नेकपा (माओवादी केन्द्र)को स्थायी समिति बैठक पार्टी केन्द्रीय कार्यालय पेरिसडाँडाामा जारी छ । बिहान ११ बजेदेखि जारी बैठकले नेताहरुको कार्यविभाजनबारे ठोस निर्णय गर्ने बताइएको छ ।
नेता गणेश शाहका अनुसार आजको बैठकमा नेताहरुको कार्यविभाजन र आगामी पुसमा आयोजना हुने राष्ट्रिय सम्मेलनको तयारीका विषय छलफल हुनेछ ।
यसअघि सम्पन्न माओवादीको केन्द्रीय समिति बैठकले सांगठनिक जिम्मेवारीलगायतका विषयमा निर्णय गर्न स्थायी समितिलाई अधिकार दिएको थियो । शाहका अनुसार निर्णयका आधारमा स्थायी समितिको बैठक बसेको हो ।
केन्द्रीय समितिको रिक्त पदपूर्ति, प्रदेश तथा जिल्लामा रिक्त पदाधिकारीहरुको पूर्तिलगायतका विषयमा बैठकले निर्णय लिनेछ । यसअघि शनिबार बसेको बैठकमा पनि सांगठनिक विषय टुंग्याउने गरि छलफल भएको थियो ।
वि.सं.२०७८ भदौ ६ आइतवार १२:५८ मा प्रकाशित
