हामी सबैकाे संसारन्यूज

भदौ ६, काठमाडौं । पार्टी विभाजनको बेला माधवकुमार नेपाललाई अन्तिम समय साथ छाडेका नेताहरुलाई फकाउन एमालेको संस्थापन पक्ष जुटेको छ । पार्टी अध्यक्ष केपी शर्मा ओलीले माधव छाडेका नेताहरुलाई फकाउन दोस्रो तहका मुख्य नेताहरुलाई जिम्मेवारी समूह नै बनाएर खटाएका छन् ।

ओलीले माधव पक्षका नेताहरु फकाउन सुवास नेम्वाङ, विष्णु पौडेल, विष्णु रिमाल, शंकर पोखरेललगायतलाई खटाएको बुझिएको छ । १० बुँदे सहमति गराएका नेताहरुले नै फकाउन सक्ने भन्दै उनीहरुलाई खटाएको बालकोट स्रोत बताउँछ ।

फकाउने सुत्र १० बुँदे र महत्वपूर्णं जिम्मेवारी

ओलीले एमाले विवाद कार्यदलले सहमति गरेको १० बुँदेलाई सम्झौता अक्षरस कार्यान्वयन हुने आश्वासन माधव पक्षका नेताहरुलाई दिएका छन् । उनले आफुँ निकटका नेताहरुमार्फत पार्टीको महत्वपूर्णं जिम्मेवारीमा पनि भूमिका दिने आश्वासन दिएको बताइएको छ ।

माधव पक्षमा नगएका सांसद तथा नेतामाथि यसअघि गरिएको सबै कारबाही पनि फिर्ता लिने ओलीको आश्वासन छ ।

बताइएअनुसार निर्वाचन आयोगले माधव पक्षलाई सनाखतको लागि बोलाएको समय अगावै ओलीले १० बुँदे कार्यान्वयनलगायतका विषयमा घोषणा गर्ने गरि तयारी गर्न लगाएका छन् । माधवले खोलेको पार्टीमा नगएका नेताहरुले शुक्रबार बैठक राख्दै सहमति कार्यान्वयन नगरे पार्टी छाड्ने चेतावनी दिएका थिए ।