Sansar News
भदौ ७, काठमाडौं । लुम्बिनी प्रदेशसभामा मुख्यमन्त्री कुलप्रसाद केसीले विश्वासको मत लिने प्रक्रिया सुरु भएको छ ।
प्रदेशसभाको नवौं अधिवेशनको तेस्रो बैठक विपक्षीको नाराबाजीबीच स्थगित भएपछि पुनः साढे २ बजे सुरु भएको बैठक सभामुखले पहिलो बैठककै कार्यसूचीअनुसार सञ्चालन गरेका छन् । विपक्षी दल एमालेले बहिस्कार गरेको बैठकमा विश्वासको मत लिने प्रक्रिया सुरु भएको हो ।
एमालले भने सांसदद्धय अजय शाही र विमलाकुमारी खत्री वलीलाई कारबाही नगरेसम्म प्रदेशसभाको बैठकमा सहभागी नहुने बताएको छ ।
लुम्बिनी प्रदेशसभामा अहिले ८० सदस्य छन् । मुख्यमन्त्री केसीले आफूमाथि प्रदेशसभाको आफूमाथि विश्वास छ भन्ने पुष्टि गर्न ४१सांसदको समर्थन जुटाउनुपर्छ ।
सत्ता पक्षमा नेपाली कांग्रेसका १९, माओवादी केन्द्रका १८ (सभामुख बाहेक),जनता समाजवादी पार्टीका ३, राष्ट्रिय जनमोर्चाका १ र स्वतन्त्र सांसद अजय शाहीसहित ४२ सांसद छन् । विपक्षी एमालेका ३७ सदस्य छन् ।
माओवादी केन्द्रका संसदीय दलका नेता केसी गत साउन २७ मा गठबन्धनका चार दल र एक सांसद गरि ४२ सांसदको समथर्नमा मुख्यमन्त्रीमा नियुक्त भएका थिए । मुख्यमन्त्री भएको तीस दिनभित्र विश्वासको मत लिनुपर्ने संवैधानिक व्यवस्था छ । उनले दुई हप्तापछि संसदबाट विश्वासको मत मागेका हुन् ।
वि.सं.२०७८ भदौ ७ सोमवार १६:५१ मा प्रकाशित
