हामी सबैकाे संसारन्यूज

८ भदौ, काठमाडौँ । नेकपा एमालेको स्थायी कमिटी बैठक विभिन्न निर्णय गर्दै सकिएको छ ।

एमालेकै एउटा समूह छुट्टिएर नयाँ दल दर्ता प्राप्तिको अन्तिम चरणमा रहेका बेला बसेको एमाले स्थायी कमिटी बैठकले पार्टी विभाजनमा गएका माधव नेपाल, झलनाथ खनाल लगायतका नेताहरुलाई मूलघरमा फर्किन आह्वान गरेको छ ।

तेस्रोधारका नेताहरुको समेत उपस्थितिमा सम्पन्न सो बैठकले पार्टी विभाजनका गतिविधिमा नजान आग्रह गर्दै फर्कन आग्रह गरेको हो ।
बैठकले फर्किएर आएमा कसैलाई कारवाही गर्ने र भेदभाव नगरिने प्रवक्ता प्रदीप ज्ञवालीले स्पष्ट पारेका छन् ।

जीवन्त र लोकतान्त्रिक पार्टीमा समस्याहरु उत्पन्न हुनु, समस्यालाई हेर्ने दृष्टिकोणमा भिन्नता हुनु र कतिपय प्रश्नमा असहमति पैदा हुनु स्वाभाविकै भएको जनाउँदै तर, समस्याका विकल्प विग्रह नभएको जनाइएको छ ।

एमालेको स्थायी कमिटी बैठकले पार्टीका सबै संरचनाहरुलाई मूलभूत रुपमा २०७५ जेठ २ अघि फर्काएको छ । तर नेकपा एकताबाट एमालेमा निरन्तरता दिएका पूर्व माओवादी नेता कार्यकर्ताहरुको हकमा भने यथावत जिम्मेवारी दिएको छ ।

त्यस्तै उक्त बैठकले एकता प्रक्रिया अघि बढाउन कार्यदलसमेत गठन प्रवक्ता ज्ञवालीले बताएका छन् । उनका अनुसार पार्टीले १० बुँदे सहमति कार्यान्वयन क्रममा उत्पन्न हुने समस्या समाधान गर्न कार्यदल गठन गरेको हो ।

कार्यदलमा महासचिव ईश्वर पोखरेलसहित उपाध्यक्ष भीम रावल, उपमहासचिव विष्णु पौडेल, घनश्याम भुसाल र स्थायी कमिटी सदस्य सुरेन्द्र पाण्डे र लेखराज भट्ट रहेका छन् ।

बैठकले माधव समूह छाडेका केन्द्रीय सदस्यहरुसहितको पहिलो बेठक भदौ १० गते बस्ने निर्णय गरेको छ । कार्यदलले दिएको सुझावका आधारमा माधव नेपालको पार्टीमा गएकाहरुबारे टुंगो लगाउने बताइएको छ ।

नेकपा एमालेले आगामी मंसिर १० देखि १२ सम्म गर्ने निर्णय गरेको छ । महाधिवेशनका तयारीका क्रममा बैठकले कात्तिक ६ गते देशभरका वडा वा सो तहका अधिवेशनको मिति तय भएको छ भने कात्तिक ९ गते स्थानीय तहका अधिवेशन तोकिएका छन् । त्यस्तै बैठकले महाधिवेशनको मिति तय गर्नुका साथै विधान महाधिवेशन असोज ४ देखि ६ सम्म गर्ने निर्णय गरेको छ ।