Sansar News
९ भदौ, काठमाडौं । सिन्धुपाल्चोकको सुनकोसी गाउँपालिकामा भएको यात्रुबाहक बस दुर्घटनामा परि ३५ जना घाईते भएका छन् ।
सिन्धुपाल्चोकको लिसंखुपाखरबाट काठमाडौं आउँदै गरेको कोशीपारी यातायातको बा.३ ख ८०३० नम्बरको बस सुनकोशी गाउँपालिका ३ छापगाउँमा दुर्घटना हुँदा ३५ जना घाईते भएको र ती मध्ये दुईको अवस्था गम्भीर रहेको जिल्ला प्रहरी कार्यालय सिन्धुपाल्चोकले जनाएको छ ।
३५ मध्ये २० जनाको धुलिखेल अस्पतालमा उपचार भइरहेको र सामान्य घाईते भएका १५ जनाको स्थानीय सिन्धु बहार अस्पतालमा उपचार भइरहेको जिल्ला प्रहरी कार्यालय सिन्धुपाल्चोकका डिएसपी दक्ष बहादुर बस्नेतले संसारन्युजलाई जानकारी दिए ।
‘अहिलेसम्म मृत्यु भएको भन्ने पुष्टि भएको छैन दुईजना बसले च्यापिएर गम्भीर हुनुभएको छ । उहाँहरुलाई उपचारका लागि धुलिखेल पुर्याइदैछ । उहाँहरु बाटोमै हुनुहन्छ ।’
विहान ११ः३५ मा भएको उक्त बस दुर्घटनाका बारेमा विस्तृत विवरण आइनसकेको र प्रारम्भिक अनुसन्धानमा घुम्ती तथा हिलो बाटो भएकाले दुर्घटना भएको हुनसक्ने बताइएको छ ।
वि.सं.२०७८ भदौ ९ बुधवार १४:३५ मा प्रकाशित
