हामी सबैकाे संसारन्यूज

भदौ १३, काठमाडौं । नेकपा (एमाले)का नेता सोमप्रसाद पाण्डेले मध्यमार्गी समूहका नेताहरुले माधवकुमार नेपाललाई धोका दिएको बताएका छन् । आइतबार रिपोर्टस क्लब नेपालले आयोजना गरेको साक्षात्कारमा बोल्दै उनले पार्टी विभाजनको अवस्था मध्यमार्गी नेताहरुको कारण भएको सुनाए ।

उनले भने,‘माधव नेपालको एक्लो प्रयत्नले उहाँ पार्टी विभाजनमा अघि बढ्नुभएको थिएन । स्थायी कमिटीका सबै जनाले धकेल्दै धकेल्दै विभाजनमा पुर्याएका हुन् । १५ जना स्थायी कमिटी सदस्यहरुले विभाजनको लागि दबाब दिएको केपी ओलीलाई बहिर्गमन गर्नुपर्छ भनेर सर्वसम्मत् निर्णय हुन्थ्यो । अगुवाई माधव नेपालले गर्नुहुन्थ्यो । हिजो माधव नेपाललाई त्यसरी अघि बढ् भन्नुभयो, उहाँहरुले अनि आज अन्तिममा आएपछि उहाँहरुले पार्टी विभाजन रोक्न सक्नुभएन ।’

माधव नेपाललाई धकेल्दै धकेल्दै पार्टी विभाजनको अवस्थासम्म मध्यमार्गी नेताहरुले पुर्याएको पाण्डेको भनाई छ ।

माधव नेपाललाई पार्टी विभाजनको अवस्थामा पुरयाउने काम नै भीम रावल, घनश्याम भुषाल, योगेश भट्टराईहरुले गरेको उनको आरोप थियो । उनका अनुसार नेकपा (एकीकृत समाजवादी)को विधान पनि मध्यमार्गी नेताहरुले तयार गरेको हुन् ।

‘सम्भवतः माधव नेपालको पार्टीको आज लेखिएको विधान हिजो माधव नेपालसँग रहेका स्थायी कमिटीकै सदस्यहरुको संलग्नतामा लेखिएको हो!, उनले भनेका छन् ।