Sansar News
१७ भदौ, मकवानपुर । नेकपा एमाले छाडेर माधव नेपाल नेतृत्वको नेकपा (एकीकृत समाजवादी) पार्टी रोज्नेहरुको लहर बढ्दै गएको छ ।
बिहीबार प्रदेश निर्वाचन कार्यालय हेटौँडामा पुगेर हेटौँडा उपमहानगरपालिकाकी उपमेयर मीना लामासहित २५ जनाले नेकपा (एकीकृत समाजवादी) पार्टीमा सनाखत गरेका छन् । उपमेयर लामासँगै मकवानपुरको कैलाश गाउँपालिकाका अध्यक्ष टंक मोक्तान, मनहरी गाउँपालिकाकी उपाध्यक्ष मनिला विष्टले नेकपा एसमा सनाखत गरेका हुन् ।
मकवानपुरका १० वटा स्थानीय तहका २५ जना जनप्रतिनिधिले नेकपा एकीकृत समाजवादीमा सनाखत गरेको प्रदेश निर्वाचन कार्यालय हेटौँडाका प्रमुख लुम्बनाथ पोखरेलले जानकारी दिए ।
त्यस्तै थाहा नगरपालिकाका वडा ११ का वडा अध्यक्ष किरणमान बलसहित अर्का एक वडा अध्यक्षले नेकपा (एकिकृत समाजवादी)मा सनाखत गरेका छन् ।
नेकपा एमाले आधिकारिक रूपमा विभाजन भएपछि गत भदौ १५ गतेदेखि २२ गतेसम्म नवगठित पार्टी नेकपा एसमा सनाखतका लागि समय सीमा दिइएको छ । आफ्ना नेताहरु माधव नेपालको पार्टीमा लागेपछि यतिबेला नेकपा एमालेका अध्यक्ष केपी शर्मा ओली तनाबमा परेको बुझिएको छ ।
वि.सं.२०७८ भदौ १७ बिहीवार २१:२० मा प्रकाशित
