Sansar News
भदौ २०, काठमाडौं । सुदुरपश्चिम प्रदेशसभामा नेकपा (एमाले)का थप तीन सांसदले पार्टी छाडेका छन् ।
आइतबार एमालेका तीन सांसद दीर्घ सोडारी, तारा लामा तामाङ र प्रकाश रावलले नेकपा (एकीकृत समाजवादी)को पक्षमा सनाखत गरेका हुन् । उनीहरु आइतबार निर्वाचन आयोगको प्रदेश कार्यालय धनगढी पुगेर सनाखत गराएका थिए ।
यसअघि एमालेका १० सांसदले माधवकुमार नेपाल नेतृत्वको नेकपा (एस)को पक्षमा सनाखत गरिसकेका छन् । योसँगै प्रदेशमा नेकपा (एस)को पक्षमा सांसदको संख्या १३ पुगेको छ भने नेकपा (एमाले)१२ सांसदमा खुम्चिएको छ ।
प्रदेशसभामा पार्टी विभाजनपूर्व एमालेसँग २५ सांसद थिए ।
पछिल्लो राजनीतिक परिवर्तनसँगै ५२ सदस्यीय प्रदेशसभामा नेकपा (माओवादी केन्द्र)सँग १३ , नेकपा (एस)सँग १३, नेपाली कांग्रेससँग १२, नेकपा (एमाले)सँग १२ र जसपासँग २ सांसद रहेका छन् । एमालेका थप केहि सांसद नेकपा (एस) तर्फ आउनसक्ने सम्भावना रहेको कारण नेकपा (एस) प्रदेशको सबैभन्दा ठूलो दल बन्ने सम्भावना छ ।
वि.सं.२०७८ भदौ २० आइतवार १६:३७ मा प्रकाशित
