हामी सबैकाे संसारन्यूज

२९ भदौ, काठमाडौँ । नेपाली शान्ति सैनिकहरुको मेडल परेड सम्पन्न भएको छ ।

यहि भदौ २५ गते परेड सम्पन्न भएको हो । सोमबार एक प्रेस विज्ञप्ती जारी गर्दै संयुक्त राष्ट्रसंघको आव्हानमा शान्ति स्थापनार्थ युएनडीओएफ मिशन सीरीयामा खटिएका श्री फोर्स हे.क्वा. सपोर्ट युनिट (शा.से.) नवौं डफ्फा, श्री मेकनाईज्ड गुल्म (शा.से.) चौथो डफ्फा, श्री ईन्जिनियर से.मु. (शा.से.) पांचौ डफ्फा, श्री लेबल–१ (+) हस्पिटल (शा.से) दोश्रो डफ्फा र क्लोज प्रोटेक्सन युनिटमा सहभागी भएका नेपाली शान्ति सैनिकहरुको मेडल परेड सम्पन्न भएको जनाएको हो ।

युएनडीओएफ एचक्यु, क्याम्प फोउअरमा आयोजना गरिएको सो कार्यक्रममा हेड अफ मिसन तथा फोर्स कमाण्डर रथी ईश्वर हमालले उक्त मेडल परेडको विधिवत रुपमा निरीक्षण तथा सम्बोधन गर्नुका साथै युएल मेडल समेत प्रदान गरेका थिए ।

साथै, युएनएमआइएसएस मिसन, दक्षिण सुडानमा रहेका श्री हाई रेडिनेश कम्पनी (शा.से.) चौथो डफ्फामा सहभागी नेपाली शान्ति सैनिकहरुको मेडल परेड कार्यक्रम सोही मितिमा मिसनका फोर्स कमाण्डर जेन.शैलेश सदाशिव टीनैकरको प्रमुख आतिथ्यतामा सम्पन्न भएको विज्ञप्तीमा उल्लेख गरिएको छ ।

फोर्स कमाण्डरलाई गार्ड अफ अँनर प्रदान गरि आरम्भ भएको सो कार्यक्रममा नेपाली सेना, हाई रेडिनेश कम्पनीका सकलदर्जा र मिसनमा कार्यरत नेपाली सेनाका स्टाफ अधिकृत तथा नेपाली सैनिक पर्यवेक्षकहरुलाई समेत उनले युएन मेडल प्रदान गरेको सेनाले जनाएको छ ।

दुवै समारोहहरुका प्रमुख अतिथीहरुले आ–आफ्नो सम्बोधनमा नेपाली शान्ति सैनिकहरुले विश्वका द्वन्दग्रस्त मुलुकहरुमा शान्ति स्थापनार्थ गरेको योगदान एवं नेपाली शान्ति सैनिकहरुको व्यवसायिक क्षमताको प्रशंसा गरेका थिए ।