हामी सबैकाे संसारन्यूज

काठमाडौं । नेकपा एमालेले नेपाल निजामति कर्मचारी संगठनका पदाधिकारी र सदस्यलाई तत्काल रिहाइ गरि आक्रमणमा संलग्नलाई कारबाहीको माग गरेको छ ।

माथिको आदेश भन्दै सोधपुछका नाममा संगठनका पदाधिकारी, सदस्य तथा कर्मचारीहरुलाई नियन्त्रणमा लिएकोप्रति आफ्नो गम्भीर ध्यानाकर्षण भएको जनाउँदै तत्काल रिहा गर्न माग गरेको हो ।

एमालेले नेपाल निजामति कर्मचारी संगठनका केन्द्रीय कार्यालय बबरमहलमा असोज ४ गते साँझ केही अराजक व्यक्तिहरुले कार्यालयभित्र अनधिकृत रुपमा प्रवेश गरी हुलहुज्जत, तोड्फोड र संगठनका केन्द्रीय अध्यक्ष केदार प्रसाद देवकोटा, वरिष्ठ उपाध्यक्ष लेखनाथ कोइराला लगायतका पदाधिकारीहरुलाई हातपात समेत गरेको भन्दै उक्त घटनाको निन्दा गरेको छ ।

‘सो घटनामा संलग्न आक्रमणकारी समुहले नेकपा (एमाले) विरुद्ध नाराबाजी समेत गरी अमर्यादित रुपमा प्रस्तुत भएको देखिएको आक्रमणकारी समुहलाई कानुन बमोजिम कारबाही गर्नुको सट्टा उल्टै कार्यालयको कर्मचारी र कार्यालय तोडफोड भएको खबर थाहा पाएपछि आफ्नो कार्यालयमा के भएछ भनी हेर्न आएका नेपाल निजामति कर्मचारी संगठनका पदाधिकारी र सदस्यहरुलाई प्रशासनले सोधपुछ र माथिको आदेशको नाममा नियन्त्रणमा लिएको सुनियोजित घटनाप्रति नेकपा (एमाले) को गम्भीर ध्यानाकर्षण भएको छ । एमालेद्धारा मंगलवार जारी विज्ञप्तिमा भनिएको छ ।