हामी सबैकाे संसारन्यूज

गैरआवासीय नेपाली संघ, राष्ट्रिय समन्वय परिषद् बेलायत (एनसीसी, यूके) ले आयोजना गरेको शुभकामना साँझ तथा च्यारिटी डिनर कार्यक्रममा करिव २८ हजार पाउण्ड संकलन गरेको छ ।

बेलायतमै आयोजित तेश्रो नेपाली विश्व स्वास्थ्य सम्मेलन तथा एनआरएनएको आसन्न दशौं महाधिवेशनको अवसर पारेर एनसीसी यूकेले आइतबार साँझ अल्डरसटमा शुभकामना साँझ तथा च्यारिटी डिनर कार्यक्रमको आयोजना गरेको हो ।

बेलायतका लागि नेपाली राजदूत लोकदर्शन रेग्मीको प्रमुख आतिथ्यतामा आयोजित शुभकामना साँझ तथा च्यारिटी डिनरमा करिव २८ हजार पाउण्ड संकलन भएको अध्यक्ष प्रेम गाहा मगरले जानकारी दिएका छन् ।

संघको आसन्न दशौं महाधिवेशनमा अध्यक्षदेखि विभिन्न पदमा उम्मेदवारी घोषणा गरेका एनआरएनएका अभियन्ताहरुलाई शुभकामना दिने उद्देश्यले पनि कार्यक्रमको आयोजना गरिएको गाहा मगरले जानकारी दिए ।

युवा तथा महिला सशक्तीकरणलाई सहयोग पुर्याउन कार्यक्रमको आयोजना गरिएको च्यारिटी डिपार्टमेन्टका प्रमुख संयोजक तथा एनसीसी यूकेका उपाध्यक्ष गोविन्द खरेलले जानकारी दिए ।

कार्यक्रमलाई सम्बोधन गर्दै बेलायतका लागि नेपाली राजदूत लोकदर्शन रेग्मीले रचनात्मक कार्यक्रमका लागि शुभकामना दिए । यस्ता रचनात्मक कार्यक्रममा सधैं सबैको सहयोग रहने उनले बताए ।

राजदूत रेग्मीले आसन्न महाधिवेशनमा उम्मेदवारी घोषणा गरेका सबै उम्मेदवारहरुलाई शुभकामना दिँदै विदेशमा रहेका नेपालीहरुको हितका लागि राजदूतावास सहकार्य गर्न तयार रहेको पनि स्पष्ट पारे ।

सो अवसरमा आइसीसी अध्यक्षदेखि विभिन्न पदमा उम्मेदवारी घोषणा गरेका प्रत्यासीहरुले भौतिक उपस्थिति र भर्चुअल रुपमा सम्बोधन गरेका थिए । केही प्रत्यासी कार्यक्रममै उपस्थित भएर आफ्ना कार्ययोजनालाई संक्षिप्त रुपमा राखेका थिए भने केही प्रत्यासीले भर्चुअल रुपमा सम्बोधन गरेका थिए ।

कार्यक्रमलाई भर्चुअल रुपमा सम्बोधन गर्दै अध्यक्ष पदका उम्मेदवार कुल आचार्यले प्रवासी नेपाली र मातृभूमिलाई सही अर्थमा जोड्ने अभियानमा आफूँ लागेको बताएका थिए ।

त्यस्तै, अन्य प्रत्यासीहरुले संघलाई वास्तविक अर्थमा परोपकारी संस्थाका रुपमा सञ्चालन गर्न लागिपर्ने प्रतिबद्धता व्यक्त गरेका थिए ।

रकमलाई युवा र महिला सशक्तीकरण अभियानमा लगाइने
कार्यक्रममा एनसीसी यूकेले च्यारिटीबाट संकलित रकमको उचित सदुपयोग हुने विश्वास दिलाएको थियो ।
अध्यक्ष गाहा मगरले जुन उद्देश्यका लागि रकम संकलित गरिएको हो, त्यही उद्देश्य प्राप्तिमा प्रयोग गरिने बताए । ‘हामीले केमा खर्च गर्यौ भन्ने कुरा सार्वजनिक मिडिया र एनसीसीको वेभसाइटमार्फत सार्वजनिक गर्ने छौं ।’ उनले स्पष्ट पारे ।

त्यस्तै, च्यारिटी डिपार्टमेन्टका प्रमुख संयोजक खरेलले आर्थिक पारदर्शिता पहिलो शर्त रहेको स्पष्ट पारे । आर्थिक पारदर्शिता पहिलो शर्त हो, यसमा हामी प्रतिबद्ध छौं, उनले भने ।

अगष्ट पहिलो साता सम्पन्न एनसीसी यूकेको निर्वाचनबाट निर्वाचित वर्तमान कार्यसमितिले एनआरएनएमा युवा र महिलाको सशक्तीकरण तथा सहभागिता वृद्धिलाई मुख्य एजेण्डा बनाएको थियो । सोही एजेण्डा कार्यान्वयनको दिशामा समिति अगाडि बढेको कार्यक्रममा बताइएको थियो ।

एनसीसी यूकेमा नयाँ कार्यसमिति चयन भएपछि आइतबार साँझ आयोजना गरिएको कार्यक्रम पहिलो र सबैभन्दा ठूलो कार्यक्रम हो ।

कार्यक्रममा एनआरएनएका अभियन्ताहरु, विभिन्न संघ संस्थाका अध्यक्ष तथा प्रतिनिधिहरु तथा विश्व नेपाली स्वास्थ्य सम्मेलनका प्रतिनिधिहरु लगायतको बाक्लो उपस्थिति रहेको थियो । सांगीतिक प्रस्तुतीहरु सहितको कार्यक्रमका सहभागी अतिथिहरुले भरपूर आनन्द लिएका थिए ।

आर्थिक संकलनका लागि प्लाटिनम, गोल्ड र सिल्भर प्रायोजनको व्यवस्था गरिएको थियो । सहभागीहरुले स्वेच्छिकरुपमा युवा र महिला सशक्तीकरण अभियान सन्चालनका लागि आर्थिक योगदान गरेका थिए ।