Sansar News
काठमाडौं । नेकपा (एमाले) डडेलधुराका जिल्ला अध्यक्ष तारा जोशीसहितको बहुमत जिल्ला कमिटी नै नेकपा (एकीकृत समाजवादी)मा प्रवेश गरेको छ । बुधबार पार्टी अध्यक्ष माधवकुमार नेपालको उपस्थितिमा जोशीसहितको टोली एकीकृत समाजवादीमा प्रवेश गरेको हो ।
एकीकृत समाजवादीमा प्रवेश गरेका जोशीले एमाले अध्यक्ष केपी शर्मा ओलीमा निरंकुशता हाबी भएको आरोप लगाए । जनता र कार्यकर्ताको भावनाअनुसार नै आफुँहरु एकीकृत समाजवादीमा समाहित भएको उनले बताए ।
४९ सदस्यीय डडेलधुरा जिल्ला कमिटीका ४१ सदस्य एकीकृत समाजवादीमा लागेका छन् । अध्यक्षसहितको बहुमत समूह नै एकीकृत समाजवादीमा लागेसँगै एमाले डडेलधुरामा निकै प्रभावहिन पनि बनेको छ ।
बताइएअनुसार १६ जनवर्गीय संगठनका जिल्ला अध्यक्षमध्ये १४ अध्यक्षहरु पनि सामूहिक रुपमै एकीकृत समाजवादी प्रवेश गर्दैछन् ।
१० बुँदे सहमति कार्यान्वयन गर्न माग गर्दै जोशीसहितको समूहले पटक–पटक संस्थापन पक्षसँग आग्रह गर्दै आएको थियो । तर, संस्थापन पक्षले भने बहुमत समूहको आग्रहलाई अस्वीकार गर्दै आएको थियो ।
वि.सं.२०७८ कात्तिक २४ बुधवार १६:५० मा प्रकाशित
