हामी सबैकाे संसारन्यूज

काठमाडौं । प्रधानन्यायाधीश चोलेन्द्र शमशेर राणाको राजीनामा माग्दै आन्दोलनमा उत्रिएका न्यायाधीहरुकै समूहमा फुट आएको छ । राणाले राजीनामा दिनुपर्ने एक सुत्रीय माग राख्दै आन्दोलनमा उत्रिएको समूहका पाँच न्यायाधीशहरुले फरक मत राखेका हुन् ।

न्यायाधीशहरुसँग नेपाल बार र सर्वोच्च अदालत बारका पदाधिकारीबीच भएको छलफललाई पाँच न्यायाधीशले बहिस्कार गरेका छन् ।

प्रधानन्यायाधीश जबराले राजीनामा नदिने अडान विज्ञप्तिमार्फत सार्वजनिक गरेपछि सोमबार दिउँसो दुई बजेदेखि न्यायाधीशहरू र बारका पदाधिकारीबीच छलफल भएको थियो । तर, छलफलमा १३ न्यायाधीश मात्रै उपस्थित थिए ।

छलफललाई न्यायाधीशहरू कुमार रेग्मी, कुमार चुडाल, बमकुमार श्रेष्ठ, तेजबहादुर केसी र मनोजकुमार शर्माले बहिस्कार गरेका हुन् । बताइएअनुसार उनीहरू नियमित मुद्दाको सुनुवाइ गर्न इजलासमा फर्किने तयारीमा छन् । उनीहरूले गोलाप्रथाबाट पेसी तोक्ने सहमति भए फर्किने तयारीमा छन् ।

झण्डै तीन सातादेखि सर्वोच्च अदालतमा प्रधानन्यायाधीशको राजीनामा माग्दै आन्दोलन चलिरहेको छ । आन्दोलनले बन्दी प्रत्यक्षीकरणका मुद्दा बाहेकका इजलास प्रभावित छन् ।