Sansar News
काठमाडौं । नेपाली कांग्रेसको केन्द्रीय समिति बैठक पार्टी कार्यालय सानेपामा सुरु भएको छ । १४ औं महाधिवेशनको पूर्वसन्ध्यामा बसेको बैठकमा वरिष्ठ नेता रामचन्द्र पौडेल र नेता प्रकाशमान सिंह उपस्थित छैनन् ।
आजको बैठकमा संस्थापन पक्षले विधान संशोधनको प्रस्ताव ल्याउने तयारी गरेकाे छ । संस्थापन पक्षले केन्द्रीय कार्य समिति र पदाधिकारीको संख्या थप्ने प्रस्ताव ल्याउन लागेको हो । पौडेल पक्षले भने यसअघि नै उक्त प्रस्तावप्रति विरोध जनाएको थियो ।
कांग्रेसको १४ औं महाधिवेशन शुक्रबारदेखि सुरु हुँदैछ । महाधिवेशनमा आकांक्षीहरुको व्यवस्थापन गर्न नसकेपछि देउवाले विधान संशोधन गरेर पदाधिकारी थप्ने तयारी गरेका हुन् ।
आफ्नो पक्षको विरोधका बीच प्रस्ताव ल्याउन लागेसँगै पौडेल र सिंहले विरोधस्वरुप बैठकमा अनुपस्थित भएका हुन् ।
वि.सं.२०७८ मंसिर २३ बिहीवार १४:२७ मा प्रकाशित
