हामी सबैकाे संसारन्यूज

काठमाडौं । नेपाली कांग्रेसका वरिष्ठ नेता रामचन्द्र पौडेल मतदान स्थलमा सहभागी नहुने बताइएको छ ।

शुक्रवारदेखि भृकुटी मण्डपमा सुरु भएको नेपाली कांग्रेसको १४ औं महाधिबेशनले पार्टीको नयाँ नेतृत्व चयनका लागि आज विहानै आठ बजेदेखि देशभरीबाट उपस्थित महाधिबेशन प्रतिनिधिहरु मतदानको लाइनमा बसेका छन् ।

सभापतिको प्रतिस्पर्धाबाट आफु अलग भएपनि आस्थावान कांग्रेसजनहरुलाई आफ्नो विवेक प्रयोग गरेर लोकतान्त्रिक प्रतिस्पर्धाको आदर्श र मूल्यललाई जोगाउन अपिल गरेका पौडेल आफू भने मतदानमा सहभागी नहुने उनका स्वकीय सचिव चिरञ्जिवी अधिकारीले जानकारी दिएका छन् ।

आफ्नै समूहमा सभापतिको उम्मेदवार बन्ने विषयमा सहमति नहुँदा पौडेल चुनावी प्रतिस्पर्धाबाट बाहिरीएका हुन् । पौडेल समूहका भनिएका डा. शेखर कोइराला र प्रकाशमान सिंह दुवैले आफुहरु सभापतिबाट पछाडि नहट्ने अडान लिएपछि पौडेले प्रेस विज्ञप्ति नै जारी गरेर चुनावी प्रतिस्पर्धाबाट बाहिरीएको घोषणा गरेका थिए ।

हाल सभापतिको प्रतिस्पर्धामा नेता शेर बहादुर देउवा, डा. शेखर कोइराला, प्रकाशमान सिंह र विमलेन्द्र निधिले आफ्नो प्यानलै बनाएर चुनावी मैदानमा उत्रिएका छन् भने कल्याण गुरुङ प्यानल बिना नै सभापति पदमा उम्मेदवारी दर्ता गरेका हुन् ।