Sansar News
काठमाडौं । नेकपा (माओवादी केन्द्र)को नयाँ नेतृत्वको लागि निर्वाचन प्रक्रिया सुरु भएको छ ।
माओवादी केन्द्रको गत आइतवारदेखि सुरु भएको आठौं महाधिबेशन अन्तर्गत जारी बन्दसत्र शनिवार विधान मस्यौदा पारित गर्दै सम्पन्न भएपछि अब निर्वाचन प्रक्रिया सुरु भएको हो ।
निर्वाचनका लागि महाधिबेशनमा सहभागी १७४२ जना महाधिबेशन प्रतिनिधिहरुको नामावली सार्वजनिक गरिएको निर्वाचन समितिले जनाएको छ ।
शनिवार दिउँसो जारी बन्दसत्रलाई सम्बोधन गर्दै पार्टीका अध्यक्ष पुष्पकमल दाहाल ‘प्रचण्ड’ ले सकेसम्म सहमतिमै नयाँ नेतृत्व चयन गर्ने र नभए निर्वाचन प्रक्रियामा जाने बताएका थिए ।
माओवादी केन्द्रको गत आइतवारदेखि जारी आठौं महाधिबेशन अन्तर्गत सोमबार देखि सुरु भएको बन्दसत्रमा अध्यक्ष प्रचण्डले पेश गरेको राजनीतिक प्रतिवेदन शुक्रवारै पारित गरिएको छ भने स्थायी कमिटी सदस्य देव गुरुङले प्रस्ताव गरेको विधान मस्यौदा परिमार्जनसहित पारित शनिवारको बन्दसत्रमा पारित भएको छ ।
नेकपा माओवादी केन्द्रले पार्टीको नयाँ नेतृत्वका लागि १५ पदाधिकारीसहित १९९ केन्द्रीय समिति चयन गर्नेछ ।
माओवादी केन्द्रको १५ पदाधिकारीमा अध्यक्ष, एक वरिष्ठ उपाध्यक्ष, ६ उपाध्यक्ष, एक महासचिव, दुई उपमहासचिव, तीन सचिव र एक कोषाध्यक्ष रहनेछन् ।
वि.सं.२०७८ पुस १७ शनिवार १७:१३ मा प्रकाशित
