Sansar News
काठमाडौं । नेपाली कांग्रेसका सभापति शेरबहादुर देउवाले नेता रामचन्द्र पौडेलसहित १० जना नेताहरुलाई केन्द्रीय सदस्यमा मनोनयन गरेका छन् ।
सभापति देउवाले नेता रामचन्द्र पौडेल, प्रकाशमान सिंह, विमलेन्द्र निधि, विजयकुमार गच्छदार, कृष्णप्रसाद सिटौला, डा. प्रकाशसरण महत, डा. नारायण खड्का, उमा रेग्मी, सुजाता कोइराला र मीन बहादुर विश्वकर्मालाई कांग्रेसको केन्द्रीय सदस्यमा मनोनित गरेको कांग्रेस सचिवालयका मुख्यसचिव कृष्णप्रसाद पौडेलले जानकारी दिएका छन् ।
मनोनित भएका नेता पौडेल, सिटौला, खड्का, रेग्मी र विश्वकर्माले कुनै पनि पदमा उम्मेदवारी दिएका थिएनन् भने सिंह र निधि सभापतिका उम्मेदवार रहेका थिए । उनीहरुले दोस्रो चरणको निर्वाचनमा देउवालाई समर्थन गरेका थिए भने गच्छदार र कोइराला उपसभापतिमा पराजित भएका थिए ।
नेपाली कांग्रेसको विधान अनुसार निर्वाचित केन्द्रीय सभापतिले केन्द्रीय समितिमा ३३ जना सदस्य मनोनित गर्ने प्रावधान अनुसार देउवाले आज १० जनालाई केन्द्रीय सदस्यमा मनोनित गरेका हुन् ।
वि.सं.२०७८ पुस १७ शनिवार २०:२९ मा प्रकाशित
