हामी सबैकाे संसारन्यूज

काठमाडौं । नेपालमा केही लक्षित वर्गका समुहलाई कोरोना भाइरसविरुद्धको अतिरिक्त खोप उपलब्ध गराइने भनिएकोमा हाललाई त्यो स्थगीत गरिएको स्वास्थ्य तथा जनसंख्या मन्त्रालयले जनाएको छ ।

मन्त्रालयले यहि पुष १९ गतेदेखि लक्षित वर्गका लागि कोभिड १९ खोपको थप मात्रा खोप दिनेबारे जारी भएको सूचना अनुसारको कार्यक्रमलाई हाल स्थगीत गरिएको जनाएको हो ।

‘सबै नागरिकलाई कोभिड १९ विरुद्धको पूरा मात्रा खोप चाडै उपलब्ध गराउन महत्वपूर्ण भएकोले राष्ट्रिय खोप अभियान द्रुत गतिमा सन्चालन गर्न आवस्यक छ’मन्त्रालयद्धारा जारी सूचनामा भनिएको छ,‘त्यसैले थप प्राविधिक विषयहरु छलफल तथा तयारी गरी आगामी माघ महिना देखि यस विषयमा जानकारी गराउने व्यहोरा सबैमा हार्दिक अनुरोध छ ।’

सरकारले यसअघि मध्यम तथा गम्भीर रुपमा रोग प्रतिरोधात्मक क्षमता कम भएका व्यक्तिहरु, सक्रिय क्यान्सर रोगीहरु, अङ्ग प्रत्यारोपण गरेका बिरामीहरु, एच.आई.भी भएका विरामीहरु, उपचारका क्रममा रोग प्रतिरोधात्मक क्षमता कम गराउने औषधि सेवन गरिरहेका विरामीहरु र भेरोसेल वा सिनोफार्म खोप लगाएका ६० वर्ष वा सो भन्दा माथि उमेरका व्यक्तिहरु उक्त अतिरिक्त खोप लगाउने सूचना जारी गरेको थियो ।