Sansar News
काठमाडौं । कांग्रेस केन्द्रीय सदस्यमा निर्वाचित विनोद चौधरीले आफू विधानअनुसार नै केन्द्रीय सदस्य भएको दाबी गरेका छन् । निर्वाचनको सबै प्रक्रिया पूरा गरेर विधानअनुसार नै आफू महाधिवेशनमा निर्वाचित भएको उनको भनाइ छ।
आफूविरूद्ध उजुरी परेपछि चौधरीले प्रतिक्रिया दिँदै निर्वाचन हारेपछि निर्वाचनकै प्रक्रियामा प्रश्न उठाउनु अलोकतान्त्रिक र अराजनीतिक चरित्र भएको बताएका छन्।
सिरहा क्षेत्र नम्बर ३ का महासमिति सदस्य डा। सुभाषचन्द्र यादवले चौधरीको पद खारेज गर्न माग गर्दै उजुरी दिएपछि बिहीबार प्रेस नोट जारी गर्दै चौधरीले भनेका छन्, “विधिसम्मत भएन भनेर रोइलो गर्नुको कुनै अर्थ छैन । नेपाली कांग्रेसजस्तो लोकतान्त्रिक पार्टीमा यस्तो व्यवहार अपेक्षित मानिदैंन ।”
महाधिवेशनमा निर्वाचन समितिले उम्मेदवारी दर्तापछि विधिवत रूपमा दावी विरोधको समय उपलब्ध गराएको स्मरण गराउँदै उनले किन दाबी विरोध गरिएन ? भनि प्रश्न गरे । “महाधिवेशनका बेला निर्वाचन समितिले उम्मेदवारी दर्तापछि विधिवत रूपमा दाबी विरोधका लागि समय दिएको थियो। म अयोग्य थिएँ भन्ने कसैलाई लागेको थियो भने त्यो समयमा किन दाबी विरोध गरिएन ?”, चौधरीको प्रश्न छ।
उजुरी दिने यादव सोही निर्वाचनमा उम्मदेवार रहेको र विजयी हुन नसकेपछि विधिसम्मत भएन भन्ने गरेको आरोप चौधरीको छ । “आफैँ सोही निर्वाचनमा उम्मेदवार हुने र विजय हुन नसकेपछि विधिसम्मत भएन भनेर रोइलो गर्नुको अर्थ छैन, नेपाली कांग्रेसजस्तो लोकतान्त्रिक पार्टीमा यस्तो व्यवहार अपेक्षित मानिदैन”, उनले भनेका छन् ।
सम्बन्धित समाचार
वि.सं.२०७८ पुस २२ बिहीवार १४:२७ मा प्रकाशित
