हामी सबैकाे संसारन्यूज

२७ फागुन,काठमाडौँ। नेपाल नेत्रहीन सङ्घले दृष्टिविहीन महिलाका लागि सुरक्षित आवास बनाउने भएको छ ।

सङ्घले कागेश्वरी मनोहरा नगरपालिकाको डाँछीमा रु डेढ करोडको लागतमा भवन बनाउन लागेको हो । सङ्घका निर्देशक नरबहादुर लिम्बूले संस्थाकै स्रोतबाट सात आना जग्गा किनेर भवन बनाउने तयारी गरिएको जानकारी दिनुभयो ।

बिहीबार भवनको शिलान्यास गर्दै सांसद दीपकप्रसाद कुइँकेलले नेत्रहीनले गरेको राम्रो कामलाई आफ्नोतर्फबाट सहयोग गर्ने प्रतिबद्धता जनाउनुभयो ।

सांसद रामेश्वर फुयाँलले दृष्टिविहीनहरुको हक, अधिकार स्थापित गर्ने काममा लाग्ने बताउनुभयो । दृष्टिविहीन महिलालाई डेरा खोज्न समस्या हुने भएकाले सुरक्षित भवन बनाउन लागिएको सङ्घका सहायक प्रशासक प्रभाकर न्यौपानेले बताउनुभयो ।

पुरुष दृष्टिविहीनको आवासका लागि पनि भवन बनाउने योजना रहेको सङ्घले जनाएको छ । विसं २०६८ को जनगणनाअनुसार नेपालमा ९५ हजार दृष्टिविहीन छन् । दृष्टिविहीनमध्ये ३८ प्रतिशत महिला छन् ।