Sansar News
काठमाडौं । माघ २८ गतेका लागि बोलाइएको नेकपा (माओवादी केन्द्र)को केन्द्रीय समिति बैठक अनिश्चितकालका लागि स्थगित भएको छ । माओवादी केन्द्रीय कार्यालयका सचिव श्रीराम ढकालले कोभिडको कारण बैठक स्थगित भएको बताए ।
“कोभिडको जोखिम उत्तिकै छ, अहिले पनि २५ जनाभन्दा बढी भेला हुन नपाइने नियम लागु छ”, ढकालले भने, “कोभिडको जोखिमलाई हेर्दै बैठक स्थगित गरिएको हो ।”
ढकालका अनुसार कोभिड संक्रमण कम भएपछि परामर्श गरेर बैठक राखिने छ । यसअघि माघ २८ र २९ गते बैठक बसेर केन्द्रीय समिति, केन्द्रीय पदाधिकारी, स्थायी र पोलिटब्युरो कमिटीलाई पूर्णता दिने बताइएको थियो ।
पुस तेस्रो साता आठौँ राष्ट्रिय महाधिवेशन सम्पन्न गरेको माओवादी केन्द्रको केन्द्रीय समिति बैठक विभिन्न कारणबाट सर्दै आएको थियो । बैठक सरेपछि माओवादीले पदाधिकारी चयन गर्न सकेको छैन ।
माओवादीको विधानमा एक अध्यक्ष, एक वरिष्ठ उपाध्यक्ष, छ उपाध्यक्ष, एक महासचिव, दुई उपमहासचिव, तीन सचिव तथा एक कोषाध्यक्ष गरी १५ सदस्यीय पदाधिकारी हुने व्यवस्था छ । अहिले विशेषगरी महासचिवलगायतका पदमा चयनको विषय निकै सकस देखिएको छ ।
वि.सं.२०७८ माघ २७ बिहीवार १६:३० मा प्रकाशित
