हामी सबैकाे संसारन्यूज

काठमाडौं । अभिव्यक्तिकै कारण पटक–पटक विवादमा तानिएका मन्त्री प्रेम आले फेरि एक पटक अभिव्यक्तिकै कारण नराम्रोसँग विवादमा फसेका छन् । उनले अश्लील शब्द प्रयोग गर्दै एक व्यक्तिलाई गाली गरेको अडियो अहिले सामाजिक सञ्जालमा भाइरल बनेको छ ।

अछाम घर भई भारतको मुम्बई बस्ने जगत ओलीलाई गरेको अश्लील गाली सामाजिक सञ्जालमा भाइरल बनेको हो । आफुविरुद्व सामाजिक सञ्जालमा जथाभावी लेखेको भन्दै मन्त्री आले अछामका जगत ओलीविरुद्व खनिएका छन् ।

उनले अडियोमा निकै अश्लिल शब्द मात्रै बोलेका छैनन् “त्यहीँबाट उठाइदिने” र “हातखुट्टा काटिदिने” धम्की पनि दिएका छन् । दोहोरो भनाभन भएको उक्त अडियो सामाजिक सञ्जालमा जगत ओलीले नै सार्वजनिक गराएका हुन् ।

बारगेनिङ्ग नमिलेपछि अडियो सार्वजनिक

मन्त्री आलेसँगको भनाभनको अडियो स्वंय जगत ओलीले नै सामाजिक सञ्जालमार्फत सार्वजनिक गराएका हुन् । उनले “एउटा जाबो कमेन्ट पचाउन नसक्ने मन्त्री प्रेम आले हेरौ मैंले भाइरल हुन हो सब मान्छे तस्करीको आरोप लागेको हो भन्ने कमेन्ट गर्दा सबैले फ्यामिलिमा नसुनौ” भन्दै अडियो हालेका छन् ।

सोमबार राती सार्वजनिक उक्त अडियो अहिले सामाजिक सञ्जालमा निकै चर्चामा छ ।

मन्त्री प्रेम आलेले भने ओलीसँग त्यसरी कुराकानी नभएको दाबी गरेका छन् । उनले आफुसँग ५० लाख माग गरेको र नदिएपछि थप केही कुरा जोडेर अडियो सार्वजनिक गरेको बताएका छन् । एक सञ्चारमाध्यमसँग कुराकानी गर्दै उनले ५० लाख माग्दै ओलीले बारगेनिङ्ग गरेको बताएका छन् ।

ओलीले गरेको पैसाको बारगेनिङ्गको टेक्स म्यासेजको स्क्रीन सट मन्त्री आलेले सार्वजनिक गराएका छन् । सार्वजनिक म्यासेजको स्क्रीन सटमा ५० लाख दिए अडियो डिलेट गरिदिने प्रस्ताव गरिएको छ । उनलाई पटक–पटक ओलीले म्यासेज गर्दै ५० बारेको प्रतिक्रिया पाउँ भन्दै म्यासेज गरेका छन् ।