हामी सबैकाे संसारन्यूज

काठमाडौं । एमसीसीको विरुद्धमा हुन थालेको प्रदर्शनप्रति अमेरिकाले आपत्ति जनाएको छ । शुक्रबार नेपालका लागि अमेरिकी राजदूत र्‍याडी बेरीले एमसीसीको विरोधमा भइरहेको प्रदर्शनप्रति सामाजिक सञ्जाल ट्विटरमार्फत आपत्ति जनाएका हुन् । उनले एमसीसीलाई लिएर हिंसा हुने वा हिंसा भड्काउने किसिमका कुराहरु आफुँहरुलाई अस्वीकार्य हुने बताए ।

दूतावासको आधिकारिक अकान्टबाट ट्वीट गर्दै राजदूत बेरीले लोकतन्त्रमा शान्तिपूर्वक आफ्नो विचार राख्ने छुट सबैलाई भएपनि हिंसा भड्काउने विचारहरु भने स्वीकार्य नहुने बताएका हुन् ।

उनले आफ्नो र दूतावासको ट्विटरमार्फत भनेका छन्, “हामी वाक स्वतन्त्रता र तथ्यमा आधारित खुला बहसको बलियो समर्थक हौं । एमसीसीको विषयमा पनि हाम्रो धारणा त्यही हो, आफ्नो विचार व्यक्त गर्न पाउनु लोकतन्त्रको अन्तरनिहित विषयवस्तु हो र सबैलाई आफ्नो धारणा शान्तिपूर्वक राख्न छुट हुनुपर्छ । तर हिंसा या हिंसा भड्काउने किसिमका विचारहरू स्वीकार्य हुँदैनन् ।”

We are a strong supporter of free speech & public discourse based in fact, including on MCC. The right to express one’s views is intrinsic to democracy, and people must be allowed to peacefully share their views. Violence & incitement to violence are never acceptable.

— Ambassador Randy Berry (@USAmbNepal) February 18, 2022

सरकारले एमसीसी सम्झौतालाई संसदमा टेबल गर्ने तयारी गरेसँगै संघीय राजधानी काठमाडौंमा जनप्रदर्शनहरु हुन थालेका छन् । बुधबार र बिहीबार संसद भवन अगाडि प्रदर्शन भएका छन् । एमसीसीविरुद्वको प्रदर्शनमा सत्तारुढ गठबन्धनकै नेताहरु सहभागि छन् ।

प्रदर्शन आक्रामक बन्दै गएपछि प्रदर्शनमा सुरक्षा निकायले निकै बल पनि प्रयोग गरेको थियो । प्रदर्शन आगामी दिनमा थप चर्किँदै जाने देखिन्छ । अमेरिकाको पछिल्लो भनाईसँगै प्रदर्शन थप आक्रामक हुने सम्भावना बढेको छ ।