हामी सबैकाे संसारन्यूज

काठमाडौं । लामो रस्साकस्सीका बीच विवादास्पद एमसीसी प्रतिनिधिसभाको बैठकमा पेश भएको छ । आइतबार बसेको बैठकमा सरकारका तर्फबाट सञ्चार मन्त्री ज्ञानेन्द्रबहादुर कार्कीले पेस गरेका थिए ।

मन्त्री कार्कीले एमसीसी पेस गर्दै गर्दा सत्तारुढ गठबन्धनकै तीन दल माओवादी केन्द्र, एकीकृत समाजवादी र राष्ट्रिय जनमोर्चाले विरोध गरेका थिए । प्रमुख प्रतिपक्षी एमाले वेलमा उभिएर नाराबाजी गरिरहेको थियो ।

एमसीसी टेबल हुँदै गर्दा बेलमा उभिएर एमालेले नाराबाजी गरिरहेको थियो यद्यपी एमालेको नाराबाजी एमसीसीको विषयमा थिए । उसले माधवकुमार नेपालसहितका १४ सांसद र सभामुखको राजीनामा मागिरहेको थियो ।

लामो समयदेखि विवाद र बहसको केन्द्रमा रहीरहेको एमसीसीप्रति भने एमालेले वेवास्ता गर्‍यो । सांसद भीम रावलले एमसीसीको विषयमा बोलेकोप्रति पनि एमालेले आपत्ति जनाएको छ । एमालेले आफुँहरुले एमसीसीको विषयमा कुनै निर्णय नगरेको भन्दै रावलले बोल्नु दलीय व्यवस्था विपरित भएको बताएको छ । एमाले एमसीसीमा मौन देखिन खोजिरहेको छ ।

अब के गर्छ एमाले ?

एमालेले अहिलेसम्म पनि एमसीसीको विषयमा कुनै निर्णय गरेको छैन् । एमसीसीको विषयमा संसदीय दलको बैठकमा छलफल गरेको भएपनि एमालेले कुनै निर्णय गरेको छैन् । एमालेले १४ सांसदमाथिको कारबाहीको विषयमा टुंगो नलाइकन अन्य विषयमा प्रवेश नगर्ने भनेको छ ।

एमालेका प्रमुख सचेतक विशाल भट्टराईले १४ सांसदमाथिको विषय टुंगो नलगाई आफुँहरु एमसीसीको विषयमा प्रवेश नगर्ने बताए । आइतबारको संसद बैठक पछि पत्रकारसँग प्रतिक्रिया दिँदै उनले एमालेलाई संसदीय काम कारबाहीमा सहभागी हुने अवस्था नै नरहेको बताए ।

“एमसीसीको पक्ष वा विपक्षमा मतदान गर्ने प्रक्रियामा एमाले सहभागी हुँदैन”, सञ्चारकर्मीलाई प्रतिक्रिया दिँद उनले भने, “हाम्रो माग सम्बोधन भएको छैन। संसदीय काम कारवाहीमा सहभागी हुने वातावरण नै बनाइएको छैन।”