हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेपालमा फेरि पुरानै सत्ता उल्टाउने कोशिस भइरहेको बताएका छन् । बुधबार सामाजिक सञ्जालमार्फत पछिल्लो राजनीतिबारे टिप्पणी गर्दै उनले यस्तो भनेका हुन् ।

“विश्व इतिहासमा हरेक क्रान्तिपछि प्रतिक्रान्तिकारीहरु फेरि पुरानै सत्ता उल्ट्याउन भरमग्दूर कोशिस गर्छन्, अहिले नेपालमा पनि क्रान्ति र प्रतिक्रान्तिकारीहरुबीच संघर्ष चलिरहेको छ”, प्रचण्डले भनेका छन् ।

तर, सबै प्रपञ्चको जालो चिरेर आफुँहरु विजयी हुने उनको भनाई छ । प्रचण्डले अगाडि भनेका छन् ,“ उनीहरुले कैयन षड्यन्त्र रचिरहेका र भ्रम छरिरहेका छन्। तर, हामी ती सबै प्रपञ्चको जालो चिरेर विजयी हुनेछौं।”

अहिले सत्ता गठबन्धन एमसीसीको विषयले गम्भीर संकटमा फसेको छ । सत्ताको नेतृत्व गरिरहेको कांग्रेस एमसीसीलाई जसरी पनि पास गर्ने योजनामा अघि बढेसँगै गठबन्धन संकटमा फसेको हो ।

कांग्रेसले सत्ता सहकार्यको लागि सत्ता साझेदारभन्दा बढी प्रमुख प्रतिपक्षी एमालेसँग संवाद गरिरहेको छ । एमसीसीमा एमालेसँग मुद्दा मिलेको कांग्रेसले सत्ता सहकार्य गर्नसक्ने सम्भावना बढेको छ ।

कांग्रेस र एमालेबीच बाक्लिएको संवादका बीच प्रचण्डको यस्तो भनाई सार्वजनिक भएको हो । यसलाई सत्ता गठबन्धन परिवर्तन हुँदै गरेको अर्थमा पनि लिन सकिन्छ ।