हामी सबैकाे संसारन्यूज

काठमाडौं । स्थानीय तहको चुनावमा प्रयोग हुने मतपत्रका विषयमा प्रमुख प्रतिपक्षी दल नेकपा (एमाले)ले प्रश्न उठाएपछि निर्वाचन आयोगले प्रष्टीकरण दिएको छ । आयोगले मतगणना गर्न सजिलो हुने मनशायले मतपत्रको रंग हरियो बनाएको बताएको छ ।

बिहीबार नियमित पत्रकार सम्मेलनमा आयोगका प्रवक्ता शालिग्राम शर्मा पौडेलले कर्मचारी, सरोकारवाला सबैको सुझाबका आधारमा मतगणना सजिलो होस् भनेर हरियो बनाएको बताए ।

“आयोगले यसअघि खटिनुभएका निर्वाचन अधिकृत, निर्वाचन आयोगबाट जानुभएका अनुगमन अधिकृतहरु तथा गणनामा खटिनुभएका कर्मचारीहरु तथा विभिन्न सरोकारवालाहरुले दिएको सुझावको आधारमा हामीले पछिल्ला निर्वाचनहरुमा निर्वाचनको मतपत्रमा प्रयोग गरिएको निर्वाचन चिह्नको रङ र हाम्रो स्वस्तिक छापको रङमा भिन्नता ल्याउँछौँ भनेका थियौँ”, उनले भने, “त्यही कुरालाई मनन् गर्दै यो निर्णय गरिएको हो।”

यसअघि २०७४ सालमा प्रयोग गरेको मतपत्रमा भएका विवरण र निर्वाचन चिह्नहरुको रङ निलो थियो। चुनावमा छाप लगाइने स्वस्तिक छापको रंग निलो हुन्छ । मतपत्र र स्वस्तिक छापको रंग एउटै किसिमको भए रातिमा मतगणना गर्न कठिन हुने आयोगको भनाई छ ।

“निर्वाचन चिह्न र स्वस्तिक छापमा प्रयोग गरिने रङ एउटै पर्न जाँदा गणनामा अप्ठ्यारो भयो। हामीले स्थानीय तहको निर्वाचनमा एकपटक स्टाम्प चोपिसकेपछि सातवटा छाप हान्नुपर्छ। कतिपय मतदातालाई फेरि एकपटक चोपेर अर्को पटक चोपेर छाप हान्ने बानी नहुन सक्छ। त्यसैले पछिल्ला चिह्नहरुमा मधुरो हुँदै जाने हुन्छ”, उनले भने ।

मतपत्रको रंगको विषयलाई लिएर प्रमुख दलका एमालेका अध्यक्ष केपी शर्मा ओलीले आपत्ति नै जनाएका छन् । उनले कांग्रेसलाई सहज हुने गरि हरियो मतपत्र ल्याइएको भन्दै स्वीकार्य नहुने बताएका छन् । ओलीले यस्तो आरोप लगाए पछि आयोगले प्रष्टीकरण पारेको हो ।