हामी सबैकाे संसारन्यूज

काठमाडौं । नेकपा (माओवादी केन्द्र)ले बागमती प्रदेशको मुख्यमन्त्री आफुँले पाएमा सुदूरपश्चिमको मुख्यमन्त्री पद छाड्ने प्रस्ताव राखेको छ । सुदूरपश्चिममा एकीकृत समाजवादीले दाबी गरिरहेको बेला माओवादी केन्द्रले यस्तो प्रस्ताव अघि सारेको हो ।

केन्द्रले हालकै अवस्थामा सुदूरपश्चिम सरकारको नेतृत्व भने छाड्न नसक्ने स्पष्ट पारेको छ । सुदूरपश्चिम सरकारको विषयमा खटपट भइरहेको बेला माओवादी केन्द्रका अध्यक्ष पुष्पकमल दाहाल ‘प्रचण्ड’ एकीकृत समाजवादीका अध्यक्ष माधवकुमार नेपालसँग यस्ताे प्रस्ताव राखेका हुन् ।

प्रचण्डले माधव नेपाललाई भेटेरै नेतृत्व सट्टापट्टाको टुंगो लागे तत्कालै सुदूरपश्चिम छाड्न तयार रहेको स्पष्ट पारेका हुन् । माओवादी केन्द्रको चुनाव केन्द्रीत कार्यकर्ता प्रशिक्षणलाई सोमबार धनगढिमा सम्बोधन गर्दै प्रचण्डले भने, “माधवजीले सुदूरपश्चिममा आफ्नो दलले मुख्यमन्त्री पाउनु पर्ने कुरा राख्नु भएको छ । बागमतीमा हामीलाई छाड्ने भए सुदूरपश्चिममा जुनसूकै बेला छाड्न तयार छौं भनेको छु ।”

प्रचण्डले प्रदेश सरकारको नेतृत्वबारे गठबन्धनका दलहरुबीच भएको समझदारीअनुसार नै अगाडि बढ्न आफुँ प्रतिबद्ध रहेको स्पष्ट पारेका छन् । प्रचण्डले समझदारीअनुसार नै माओवादी केन्द्रले कर्णाली छाडेको प्रष्ट पारे ।