हामी सबैकाे संसारन्यूज

पोखरा । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले माओवादी एक्लै, आफ्नै खुट्टामा उभिने गरी चुनावको तयारीमा लागेको बताएका छन् । आइतबार पोखरामा सञ्चारकर्मीहरुसँग कुराकानी गर्दै उनले चुनावमा गठबन्धनभन्दा माओवादीको प्राथमिकता आफ्नै संगठबन बनाउने रहेको बताए ।

“निर्वाचन गठबन्धनबाट हुन्छ कि एक्लै हुन्छ भन्ने आम सवाल छ”, प्रचण्डले भने, “हामी गठबन्धन होला र चुनाव जितौंला भनेर बस्ने होइन, आफ्नै खुट्टामा उभिने हो, आफ्नै संगठनलाई बलियो पार्ने हो ।”

उनले जनताका मुद्दा माओवादीको प्रमुख एजेण्डा भएको भन्दै त्यसैलाई लिएर चुनावमा जाने बताए । चुनावी तालमेलबारे प्रचण्डले सबैखाले सम्भावना खुला राख्ने बताए ।

एमालेसँग गठबन्धन हुने कुरा नरहेको प्रचण्डले स्पष्ट पारे । कांग्रेसका केही नेताको अभिव्यक्तिलाई संकेत गर्दै एमालेसँगको विषय उठाएको उनले स्पष्ट पारे ।

“कांग्रेसका केही नेताले तुच्छ भाषा बोल्नुभयो, त्यसैले मैले एमालेसँग पनि गठबन्धन हुनसक्ने कुराको संकेत गरेको हुँ”, प्रचण्डले भने, “तर अहिले एमालेसँग गठबन्धन गर्ने कुरा छैन । यही गठबन्धन कायम रहन्छ ।”

प्रचण्डले चुनाव हुन्छ कि हुँदैन भन्ने दुविधा नपाल्न पनि नेता तथा कार्यकर्ता पंक्तिमा आग्रह गरेका छन् । उनले तोकिएकै समयमा चुनाव हुने भन्दै चुनावी तयारीमा जुट्न आग्रह गरे ।