हामी सबैकाे संसारन्यूज

काठमाडौं । सुन तस्करीको ट्रान्जिट बन्दै गएको नेपालमा पछिल्लो पटक तस्करहरुले सुन ल्याउन नयाँ नयाँ उपाय अपनाएको देखिन्छ ।

यसअघि साउदी, कतार, युएई, मलेसिया लगायतका देशबाट सुनका विभिन्न गहना बनाएर ल्याउने, मलद्धारभित्र लुकाएर ल्याउनेलगायतका विभिन्न उपाय अपनाएर ल्याउने गरिएको छ ।

तर अब सुन तस्करले जनावरलाई पनि प्रयोग गर्न थालेको समाचार सोमबारको आर्थिक राष्ट्रिय दैनिकमा रहेको छ । उक्त समाचार अनुसार चीनबाट मनाङको नाका हुँदै ल्याइएका खसीलाई सुन बोकाइएको पाइएको छ ।

गत माघको दोस्रो साता प्रहरीले शंकाको आधारमा काठमाडौं भित्रदै गरेका १३ वटा खसी र खसी ल्याउने व्यक्ति तथा त्यस क्षेत्रमा कार्यरत भन्सारका केही कर्मचारीलाई समेत अघोषित नियन्त्रणमा लिएर निगरानीमा राख्यो । त्यस लगत्तै ती १३ वटा खसीहरु काटेर हेर्दा खसीको पेटमा ३८ देखि ४२ वटा टुक्रा सम्मका झण्डै २८ करोड मूल्यको सुन फेला परेको थियो ।

तस्करले सुनको डल्लालाई टुक्रा पारेर खोलेजस्तो चिप्लो पदार्थमा मिसाएर खसीलाई खुवाएर ल्याइएको अनुसन्धानमा पत्ता लागेको छ ।
तस्करहरुले चिनियाँ सीमाबाट सुन नेपाल ल्याउउने र त्यसलाई टुक्रा टुक्रा पारेर खसीलाई खुवाएर खसी बेच्ने बहानामा सुन तस्करी गरेको अनुसन्धानमा खुलेको छ ।