हामी सबैकाे संसारन्यूज

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले वीरअस्पतालमा उपचाररत पूर्व जनमुक्ति सेनाका सेक्सन कमाण्डर भक्त रानाको उपचारमा पहल गर्ने बताएका छन् ।

काभ्रे महाभारत गाउँपालिका ६ का राना मकवानपुरको झुरझुरेमा घाइते भएका राना शान्ति प्रक्रियापछि वाइसीएलको जिम्मेवारीमा रहि काम गर्दै आएका थिए । टाउकोमा लागेको चोट बल्झिएपछी उनको खुट्टामा इन्फेक्सन देखिएको र त्यसको कारण दुबै खुट्टा अप्रेसन गरेर फाल्नु परेको अस्पतालले जनाएको प्रचण्डको स्वकीय सचिव रमेश मल्लले जानकारी दिए ।

हाल परिवार, महाभारत गाउँपालिका, पार्टी तथा सुभेच्छुकहरुको सहयोगमा उपचार गराइरहेका रानाको स्वास्थ्य अवस्था बुझ्न आज बिहान अस्पताल पुगेका अध्यक्ष प्रचण्डले आगामी दिनमा पार्टी र सरकारको तर्फबाट उपचारको पहल तथा व्यवस्थामा कुनै कमि हुन नदिने आस्वासन दिएका थिए ।

मल्लका अनुसार  अध्यक्ष प्रचण्डले रानाकी श्रीमतीका लागि रोजगारीको व्यवस्था र सात बर्षको बच्चाको पढाईका लागि समेत पहल गर्ने बताएका थिए ।