हामी सबैकाे संसारन्यूज

काठमाडौं । नेपाली कांग्रेसका नेता शेखर कोइरालाले २०७४ सालमा जस्तै एमाले र माओवादी केन्द्र एक हुनसक्ने सम्भावना रहेको बताएका छन् । मंगलबार कोइराला निवासमा आयोजित चुनावी गीत सार्वजनिकीकरण कार्यक्रममा बोल्दै यस्तो सम्भावनाबारे बोलेका हुन् ।

“अहिले मेरो देशभरिका कार्यकर्ता साथीहरूसँग कुराकानी भइरहेको छ, सबैको मत गठबन्धन गरेर जानु हुँदैन भन्नेछ”, कोइरालाले भने, “तर, यसो भनिरहँदा २०७४ मा जस्तो एमाले र माओवादीहरू फेरि मिल्लान् कि भन्ने चिन्ता पनि छ ।”

वामपन्थीहरु मिले ०७४ कै हालतमा कांग्रेस पुग्ने चिन्ता उनको छ । कोइरालाले चुनावी गठबन्धनको विरोध गर्दै आएका छन् ।

उनले चुनावी गठबन्धन केका लागि गर्ने भन्ने प्रष्ट हुनुपर्ने बताए। “अरु पार्टीहरुलाई जिताउनका लागि गठबन्धन हो कि ती पार्टीहरुले नेपाली कांग्रेसलाई पनि भोट दिनका लागि गठबन्धन हो”, उनले भने, “हाम्रो नेताहरुको सोच त्यता पनि जानुपर्ने आवश्यकता मैले देखेको छु। नेपाली कांग्रेसलाई गठबन्धनबाट फाइदा हुन्छ कि हुँदैन। भोट आउँछ कि आउँदैन ?”

कोइरालाले तल्लो तहका कार्यकर्ताको धारणा गठबन्धन बनाउन नहुने रहेको बताए । उनले भने, “कार्यकर्ता तहमा हामीहरु गठबन्धन गरेर जानु हुँदैन भन्ने छ। गठबन्धनले नेपाली कांग्रेसलाई फाइदा गर्दैन भन्ने छ ।”