हामी सबैकाे संसारन्यूज

विराटनगर । प्रदेश नं १ का मुख्यमन्त्री राजेन्द्रकुमार राईले भाषा, साहित्य, कला र संस्कृतिको संरक्षण गर्नुपर्नेमा जोड दिएका छन् । मुख्यमन्त्री राईले नेपाल प्रज्ञा प्रतिष्ठान र विराट साहित्य सङ्गमको सहकार्यमा आयोजित प्रदेशस्तरीय वृहत वाङ्मय सङ्गोष्ठीको आज उद्घाटन गर्दै यस्तो बताएका हुन् ।

मुख्यमन्त्री राईले संस्कृति लोप हुनबाट जोगाउनु पर्ने बताएका छन् । मुख्यमन्त्री राईले भने, “यस क्षेत्रमा किराँतको लामो इतिहास र सभ्यता रहेको छ”, उनले भने, “भाषा, साहित्य र संस्कृतिको खोज एवं अनुसन्धान हुनुपर्छ ।”

नेपाल प्रज्ञा प्रतिष्ठानका कुलपति गङ्गाप्रसाद उप्रेतीको अध्यक्षतामा भएको सो कार्यक्रममा विराट साहित्य सङ्गमका अध्यक्ष मधु पोखरेल, रामबाबु दाहाल, हेमराज पौडेल र रामरिझन यादवले पनि आ-आफ्नो धारणा राखेका थिए । शनिबारसम्म चल्ने सो गोष्ठीमा सुनसरी, मोरङ र झापाका कवि, साहित्यकार, लेखक, संस्कृतिविद् र समालोचकको सहभागिता रहेको छ ।