हामी सबैकाे संसारन्यूज

२० चैत, काठमाडौँ । अष्ट्रेलिया महिला क्रिकेट टिमले सातौँ पटक एकदिवसीय विश्वकपको उपाधि आफ्नो नाममा गरेको छ । अष्ट्रेलियाले इंल्याण्ड महिला क्रिकेट टिमलाई फाइनलमा ७१ रनले पराजित गर्दै सातौँ पटक उपाधि आफ्नो नाममा गरेको हो ।

फाइनलमा टस हारेर पहिले ब्याटिङ्ग गरेको अष्ट्रेलियाले ५० ओभरमा ५ विकेट गुमाएर ३५६ रन बनाएको थियो । अष्ट्रेलियाका लागि एलिसा हेलीले सर्वाधिक १३८ बलमा १७० रनको उत्कृष्ट पारी खेलेकी थिइन् । त्यसक्रममा उनले २६ चौका प्रहार गरेकी थिइन् । त्यसैगरी राहेल हेन्सले ६८ र बेथ मुनीले २८ रनको पारी खेलेकी थिइन् । इंल्याण्डका लागि बलिङ्गमा अन्या श्रबसोलले सर्वाधिक ३ विकेट हात पारेकी थिइन् ।

३५७ रनको विशाल लक्ष्य पछाएको इंल्याण्डको टिम ४३.४ ओभरमा २८५ रन बनाएर अलआउट हुन पुगेको थियो । इंल्याण्डका लागि ब्याटिङ्गमा नताली स्काइभरले १२१ बलमा १४८ रनको नटआउट पारी खेले पनि टिमलाई जित भने दिलाउन सकिनन् । अष्ट्रेलियाका लागि अलाना किंग र जेस जोनासनले सर्वाधिक ३/३ विकेट लिएका थिए ।

यसअघि अष्ट्रेलिया महिला क्रिकेट टिमले १९७८, १९८२, १९८८, १९९७, २००५ र २०१३ मा एकदिवसीय विश्वकपको उपाधि आफ्नो नाममा गरिसकेको थियो ।