हामी सबैकाे संसारन्यूज

काठमाडौं । पञ्चकन्या ग्रुप र काठमाडौं इन्स्टिच्युट अफ चाइल्ड हेल्थ (के.आई.ओ.सि.एच.)बीच एक सम्झौता भएको छ ।

उक्त सम्झौतामा झापाको दमक वडा नं. ७ मा बन्दै गरेको बालअस्पतालमा ६० लाख मूल्यको एलजिएस स्ट्रक्चरबाट ४००० हजार बर्ग फिट क्षेत्रफलमा अस्पतालका कोठा तथा भौतिक संरचना निर्माण गर्ने सहमति भई एक सम्झौता पत्रमा हस्ताक्षर भएको हो ।

हालै दिवंगत भएकी पञ्चकन्या ग्रुपका अध्यक्ष प्रेमबहादुर श्रेष्ठको पत्नी निलकुमारी श्रेष्ठको स्मृति तथा पञ्चकन्या ग्रुपले आफ्नो आद्योगिक यात्राको ५०औं वर्ष पुरा गरेको अवसरमा उक्त अस्पताललाई सामाजिक उत्तरदायित्व अन्तर्गत सहयोग गरेको ग्रुपले जनाएको छ ।

समझदारी कार्यक्रममा पञ्चकन्या ग्रुपबाट उपाध्यक्ष ध्रुबकुमार श्रेष्ठ, प्रबन्ध निर्देशक प्रदीपकुमार श्रेष्ठले मन्तव्य राखेका थिए ।
मन्तव्यको क्रममा दुबैले स्वास्थ्य जस्तो पवित्र कार्यमा हातेमालो गर्न पाउनु दुबै संस्थाको लागि गौरवको विषय भएको र यसबाट आत्मसन्तुष्टि अमुल्य हुने विचार गरेका थिए ।

त्यस्तै के.आई.ओ.सि.एच.का डा. भगवान कोइरालाले राजधानीको जत्तिकै सुविधा सम्पन्न बाल अस्पतालको खाँचो सो अस्पताल सञ्चालनमा आएपछि पुरा हुने बताएका थिए ।

पञ्चकन्या ग्रुपले १ महिनाभित्र एलजिएसका संरचना निर्माण गरी अस्पताललाई हस्तान्तरण गर्ने जनाएको छ । साथै सम्झौतापत्र हस्ताक्षर कार्यक्रममा दुबै संस्थाका सञ्चालक र कर्मचारीहरुको समेत उपस्थिति रहेको थियो ।