हामी सबैकाे संसारन्यूज

काठमाडौं । स्थानीय निकायको चुनाव आउन जम्मा २६ दिन बाँकी छ । निर्वाचन आयोगको निर्वाचन कार्यतालिकाअनुसार अबको ७ दिनमा मनोनयन दर्ता गर्नुपर्छ । तर, मनोनयन दर्ता हुने समय नजिँकिदै गर्दा पनि सत्तारुढ दलहरुले उम्मेदवार चयन गर्न सकेका छैनन् ।

सत्तारुढ गठबन्धन साझा उम्मेदवार चयन गर्ने विषयमा अलमलिँदा प्रमुख प्रतिपक्षी नेकपा (एमाले) भने धमाधम उम्मेदवार चयनको प्रक्रियामा अघि बढेको छ । एमालेले तल्लो तहदेखि सहमति वा प्रतिस्पर्धात्मक रुपमै उम्मेदवार चयन गरिरहेको छ । एमालेले चर्चामा रहेको भरतपुर महानगरमा उम्मेदवार चयन गरिसकेको छ । एमालेले गत आइतबार विजय सुवेदीलाई भरतपुर महानगरमा मेयरको उम्मेदवार बनाउने निर्णय गरेको थियो ।

अन्य महानगर र उपमहानगर पनि एमालेले केही दिनमै टुंगो लगाउने तयारी गरेको छ । धेरै आकांक्षी रहेका स्थानीय तहमा एमालेभित्र धमाधम आन्तरिक चुनावी प्रतिस्पर्धा पनि भइरहेको छ ।

तर, साझा उम्मेदवार चयन गर्ने प्रयासमा जुटेको सत्ता गठबन्धनभित्र भने उम्मेदवार चयनको विषयमा थप किचलो देखिन थालेको छ । भरतपुरसहित थुप्रै स्थानीय तहमा कुन दलको उम्मेदवार बन्ने भन्ने विषय पेचिलोपूर्णं बन्दै गएको छ । यसअघि जितेका ठाउँमा सोही दलले दाबी गर्ने र एमालेले जितेका ठाउँमा सहमतिबाट अगाडि जाने पूर्ववत सहमतिबाट दलहरु आफैं पछाडि हट्न थालेका छन् ।

विशेषतः चुनावी तालमेल गर्ने विषयमा सत्ता गठबन्धनको नेतृत्व गरिरहेको कांग्रेसभित्र आन्तरिक किचलो बढ्दै गएको छ । कांग्रेसभित्र अधिकांश स्थानीय तह आफ्नो अनुकुल भएको भन्दै गठबन्धन नगर्ने मत जबरजस्त देखिन थालेको छ । किचलो बढ्दै गइरहेका बेला कांग्रेसका केही नेताहरुले खुलेरै तालमेल नगर्ने विषयमा धारणा राख्न थालेका छन् ।

“भरपुरसहितका केहीमा मित्रवत प्रतिस्पर्धा”

कांग्रेसभित्र केन्द्रमा देखिएको भरतपुर महानगरपालिका सहितका केही स्थानीय तहमा तालमेल नगर्ने मत बलियो गरि देखिएको छ । शनिबार पार्टी कार्यालय सानेमा बसेको केन्द्रीय कार्यसम्पादन समितिको बैठकमा नेताहरुले भरतपुरसहित विवाद देखिएका स्थानमा मित्रवत प्रतिस्पर्धा गरेर जानुपर्ने प्रस्ताव राखेका थिए ।

पार्टी महामन्त्री विश्वप्रकाश शर्माले स्थानीय नेता तथा कार्यकर्ताको भावना विपरित तालमेल गर्न नहुने प्रस्ताव बैठकमा राखेका थिए । उनले बैठकमा भनेका थिए, “भरतपुरमा कांग्रेसले पनि छोड्ने अवस्था छैन । माओवादी केन्द्रले पनि नछोड्ने बताइरहेको छ । स्थानीय भावना र स्थानीय आवश्यकताले भन्छ भरतपुरसहितका केही ठाउँमा मित्रवत् प्रतिस्पर्धा गर्नुपर्छ । यही नै सबैका लागि हितकर छ ।”

तालमेलको निर्णयले कांग्रेसभित्र विद्रोह

तालमेल गर्ने निर्णयसँगै कांग्रेसभित्र विद्रोह देखिन थालेको छ । विशेषतः भरतपुरको विषयमा कांग्रेस कार्यकर्ताले विद्रोह गरेका छन् । भरतपुरमा माओवादीलाई सघाउने निर्णयविरुद्व कांग्रेसको वडा कमिटीले सामूहिक राजीनामा दिएका छन् । भरतपुरको वडा नम्बर १७ को वडा कमिटीले शनिबार सामूहिक राजीनामा दिएका थिए ।

यता, पोखरा महानगरको मेयर एकीकृत समाजवादीलाई दिने निर्णयविरुद्व कांग्रेसको पोखरा नगर कमिटी आक्रोशित भएको छ । नगरकमिटीले निर्णय नसच्याए सामूहिक रुपमा विद्रोह गर्ने चेतावनी दिएको छ । नगरकमिटीले केही दिनअघि प्रधानमन्त्रीसमेत रहेका सभापति शेरबहादुर देउवालाई भेटेर विद्रोहको चेतावनी दिएको थियो ।