Sansar News
काठमाडौं । सत्तारुढ गठबन्धनका शिर्ष नेता तथा गठबन्धनको स्थानीयतह निर्वाचन तयारी तथा अनुगमन समितिको बैठक बस्दैछ ।
प्रधानमन्त्री निवास बालुवाटारमा सोमबार बिहान ९ बजे बस्ने उक्त बैठकमा निर्वाचनमा पालिकाहरुको भागबण्डा लगायतका विषयमा छलफल हुने बताएको छ ।
गठबन्धनका शिर्ष नेताहरुको आइतबार बसेको बैठकमा दलहरुले ६ महानगरपालिकामा आ–आफ्नो दावी गरेका थिए । जसमा नेकपा (माओवादी केन्द्र) ले भरतपुर, नेकपा (एकिकृत समाजवादी) ले पोखरा र जनता समाजबादी पार्टी (जसपा)ले वीरगन्ज महानगरपालिकाको मेयर पदमा आफ्नो पार्टीको दावी गरेका थिए ।
आजको बैठकमा पनि कुन महानगरपालिका र उपमहानगरपालिका कुन दलले लिने भन्ने भागबण्डाका विषयमा छलफल तथा निर्णय हुने बताइएको छ । आइतबारको बैठकमा अन्य पार्टीले महानगरमा दावी गरिरहँदा नेपाली कांग्रेसले भने कुनै दावी गरेको थिएन ।
यद्यपी भरतपुरमा अन्य दललाई प्रमुख पद नदिने भन्दै त्यहाँका कांग्रेस नेता तथा कार्यकर्ताहरुले नेतृत्वलाई खबरदारी गर्दै आएका छन् भने पोखरामा पनि मेयर पदका लागि कांग्रेसबाट १८ जनाले आवेदन दिएका छन् ।
त्यस्तै कांग्रेसको शनिबार बसेको केन्द्रीय समितिको बैठकमा महामन्त्री विश्वप्रकाश शर्माले २०७४ मा भरतपुरको मेयर पद माओवादी केन्द्रलाई छाडेकाले अहिले कांग्रेसले पाउनुपर्ने बताएका छन् । यद्यपी माओवादी केन्द्रले मेयर पद नछाडे मित्रवत प्रतिश्प्रर्धा गर्नुपर्ने समेत उनले बताएका छन् ।
वि.सं.२०७९ वैशाख ५ सोमवार ०८:१० मा प्रकाशित
