हामी सबैकाे संसारन्यूज

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले माओवादी छोडेर गएकाहरु मुलघरमै फर्किने अभियान सुरु भएको बताएका छन् ।

नेपाल कम्युनिष्ट पार्टीको ७३ औं स्थापना दिवसको अवसरमा पार्टी कार्यालय पेरिसडाँडामा आयोजित कार्यक्रममा सम्बोधन गर्दै अध्यक्ष प्रचण्डले दिनदिनै सयौं र हजारौंको संख्यामा मात्र नभएर संस्थागत रुपमै हिँजो अलग भएका पार्टीहरु फेरि माओवादी केन्द्रमा मुल घरमा जोडिने प्रक्रिया सुरु भएको बताएका हुन् ।

अध्यक्ष प्रचण्डले त्यो क्रम पूर्वदेखि पश्चिमसम्म निकै बढेको बताउँदै हिँजो माओवादीबाट विभाजन भएर गएका माओवादीहरुबीच पनि विभाजनको औचित्य पुष्टि गर्न नसकेपछि पश्चाताप गरेर माओवादी केन्द्रमा फर्किनुपर्ने बहस चलेको बताए ।

अध्यक्ष प्रचण्डले कैलालीबाट माओवादी क्रान्तिकारीहरुलाई एकताको निम्ति अपिल गरेको बताउँदै इतिहासमा फेरि एकपटक अवसर आएकोले त्यो अवसर गुमाउन नहुने बताए । उनले भने–‘एक ढिक्का भएर निर्वाचन अभियानमा जानुछ । यो परिवर्तनको निम्ति त्याग र बलिदानको किर्तिमान कायम गर्नेहरुको सपना पूरा गर्नुछ ।’

अध्यक्ष प्रचण्डले यतिबेला निर्वाचनको संघारमा रहेको र निर्वाचन प्रतिगमन र अग्रगमन कस्ले जित्ने हो भन्ने कुराको फैसला हुने समय रहेको भन्दै परिवर्तनका मुद्दाहरुलाई स्थापीत गर्न सबै एकजुट भएर यो लडाई जित्नुपर्ने बताए ।

‘हामीले जित्दा राष्ट्रले जित्छ परिवर्तनका मुद्दाले जित्छ । सयौं वर्षदेखि उत्पीडन र शोषणमा परेका जनताको जित हुन्छ । हामीले हार्दा प्रतिगमनले जित्ने खतरा बढ्छ ।’ अध्यक्ष प्रचण्डले भने ।