हामी सबैकाे संसारन्यूज

काठमाडौं । आन्तरिक वायुसेवा कम्पनीहरुले भोलि रातिदेखि हवाई उडान बन्द गर्ने चेतावनी दिएका छन् । नेपाल नागरिक उड्डयन प्राधिकरणले १८ घण्टा विमानस्थल सञ्चालन गर्न भन्दै नयाँ तालिका र स्लट सार्वजनिक गरेपछि आन्तरिक उडानका वायुसेवा कम्पनीहरुले त्यसलाई कार्यान्वयन नगर्ने र जबरजस्ती गरिए उडान बन्द गर्ने चेतावनी दिएका हुन् ।

प्राधिकरणले बुधबार नियमित उडान गरिरहेका आन्तरिक उडानका वायुसेवा कम्पनीहरुलाई पत्र लेखेर नयाँ उडान तालिकाबारे जानकारी गराएको थियो । तर, त्यस्तो तालिकाअनुसार उडान कार्यान्वयन गर्न प्राविधिक समस्या रहेको भन्दै कम्पनीहरु तत्काल उडान गर्न अस्वीकार गरेका हुन् ।

वायु सेवा सञ्चालक संघ प्रवक्ता योगराज कंडेल शर्मा वायु सेवा कम्पनीहरुले तत्कालका लागि राति आठ बजेपछि नियमिततर्फका उडान गर्न सक्ने अवस्था नरहेको बताए । प्राधिकरणले दिएको स्लट र तालिका तत्कालै कार्यान्वयन गर्न नसकिने र यसको लागि केही समय माग गरिए पनि प्राधिकरणले एकतर्फी निर्णय गरेको उनको भनाइ छ ।

प्राधिकरणले भने भोलिदेखि नै रात्रिकालीन उडान हुने विमानस्थलमा दैनिक १८ घन्टा उडान गर्ने निर्णय गरिसकेको छ ।