हामी सबैकाे संसारन्यूज

काठमाडौं । स्थानीयतहका विभिन्न पदमा उम्मेदवारी दिएका उम्मेदवारहरुले पार्टी कार्यालय बाहेक अन्य स्थानमा पार्टीको झण्डा वा चुनाव चिन्ह राखेको पाइएमा उम्मेदवारबाटै हटाइने चेतावनी दिएको छ ।

दल वा उम्मेदवारहरुको चुनाव चिन्ह् वा दलको झण्डाको तोरण बनाई सार्वजनिक प्रदर्शन गर्न वा गराउन नहुने, कुनै किसीमको भित्तेलेखन गर्न वा गराउन नहुने व्यवस्था विपरित कतिपय स्थानमा कानुनले बर्जित गरेका काम भइरहेको भन्दै आयोगले यस्तो चेतावनी दिएको हो ।

राजनीतिक दल, उम्मेदवार, निर्वाचन प्रतिनिधि वा कुनै व्यक्तिेले आचारसंहिता विपरीत पोष्टर, भित्ते लेखन, तुल, व्यानर, डिजिटल, डिस्प्ले जस्ता प्रचारात्मक सामग्री प्रयोग गरेको पाइएमा तत्काल हटाउने वा हटाउन लगाउने र त्यस्तो स्थानलाई दुरुस्त बनाई राख्न समेत आयोगले आग्रह गरेको छ ।

‘त्यस्तो सामग्री जुन स्थानमा राखिएको छ सोहि स्थानीयतहको उम्मेदवारले राखेको ठहर गरी सोहि दल वा उम्मेदवारबाटै हटाउन आदेश दिई आदेशको बर्खिलाप गर्ने र राजनीतिक दल, उम्मेदवार, व्यक्ति, संस्था, पदाधिकारी वा निकायलाई आयोगले एकलाख रुपैयाँसम्म जरिवाना गराउनेछ,’ आयोगद्धारा जारी विज्ञप्तिमा भनिएको छ, ‘र कुनै उम्मेदवारले आयोगले बनाएको आचारसंहिताको उल्लंङघन गरेको कारणबाट निर्वाचन स्वतन्त्र, स्वच्छ र धाँधलीरहित तबरबाट हुन नसक्ने कुरामा आयोग विश्वस्त भएमा त्यसको स्पष्ट आधार र कारण खोली आयोगले त्यस्ता उम्मेदवारको उम्मेदवारी रद्द समेत गर्ने प्रावधानको सरोकारवालालाई स्मरण गराइ कारबाहीको लागि सम्बन्धीत जिल्लाको निर्वाचन कार्यालयलाई पठाइनेछ ।’