हामी सबैकाे संसारन्यूज

काठमाडौं । नेपाल राष्ट्र बैंकका गभर्नर महाप्रसाद अधिकारीले बैंकको ब्याजदर थप बढ्ने बताएका छन् ।

बुधबार काठमाडौंमा चार्टर्ड एकाउन्टेन्ट्स संस्था अफ नेपाल (आईक्यान)ले आयोजना गरेको लेखा व्यवसायी सम्मेलनमा अधिकारीले सो कुरा बताएका हुन् ।

बैंकिङ प्रणालीमा लगानीयोग्य तरलता अभाव बढेको र त्यसको असर ब्याजदरमा परेको उनको भनाइ थियो । वर्तमानमा देखिएको आर्थिक अवस्थाको कारणले पनि बैंकको ब्याजदर बढ्ने गभर्नर अधिकारीले बताए ।

ब्याजदर बढ्नेतर्फ संकेत गर्दै उनले अहिले नीतिगत ब्याजदर नै थप बढाउनुपर्ने अवस्था देखिएको र वर्तमान परिस्थितिले नै ब्याजदर वृद्धिको ‘डिमान्ड’ गरिरहेको तर्क गरे ।

ब्याजदर कोभिडको अगाडिको अवस्थामा पनि नगएको बताउँदै उनले परिस्थितिले ब्याजदर अहिलेको भन्दा माथि जानुपर्छ भन्ने डिमान्ड गरिरहेको बताए ।

वर्तमान ब्याजदरलाई नीतिगत रुपमा नै बढाउनुपर्नेतर्फ जोड दिँदै गभर्नर अधिकारीले राष्ट्र बैंकले मौद्रिक नीतिको मध्यावधि समीक्षा गर्दै नीतिगत ब्याजदर २ प्रतिशत बढाएको स्मरण गराए ।

त्यस्तै उनले अर्थतन्त्र र बाह्य क्षेत्रमा देखिएको समस्या समाधान गर्ने मुख्य औजार भनेकै नीतिगत ब्याजदर भएको र तत्कालका लागि आयातमा प्रतिबन्ध लगाउने र एलसीमा नगद मार्जिन राख्नेजस्ता केही अस्थायी औजारको प्रयोग गरेको उनको भनाई थियो । नेपाल राष्ट्र बैंकले वर्तमान अवस्थामा प्रयोग गरिरहेको औजारहरु भनेको सीमित अवधिका लागि मात्रै भएकोले बैंकिङ तरलतामा सुधारका लागि मौद्रिक औजार भनेको नीतिगत ब्याजदर भएको उनले बताए ।

अर्थततन्त्र जोगाउनका लागि पनि अहिले ब्याजदर वृद्धि आवश्यक रहेको गभर्नर अधिकारीको तर्क छ । उनि भन्छन्, ‘अर्थतन्त्र रह्यो भने मात्रै त्यहाँभित्र हामी रहने हो । त्यहाँभित्र व्यापारीले व्यापार र उद्योगीले उद्योग गर्ने हो । अर्थतन्त्र नै रहेन भने के गर्ने ? अहिले अर्थतन्त्र कसरी जोगाउने त्यतातिर सोच्नुपर्छ । ब्याजदर थप वृद्धि हुन्छ, त्यसका लागि सबै तयार रहनुपर्छ ।’