हामी सबैकाे संसारन्यूज

काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी औपचारिक रुपमा विभाजित भएको छ । नेता धर्मेन्द्र बास्तोला नेतृत्वको समूहले नेकपा (बहुमत) गठन गरेको छ ।

सोमबार काठमाडौंमा पत्रकार सम्मेलन गर्दै बास्तोला नेतृत्वको समूहले नयाँ पार्टी गठन गरेको जानकारी गराएको हो । असन्तुष्ट पक्षले बास्तोलालाई केन्द्रीय संयोजकको रुपमा चयन गरेको जानकारी दिएको छ ।

पार्टी घोषणाबारे जानकारी दिन आयोजित पत्रकार सम्मेलनमा नेता बास्तोलाले एमालेको चुनाव चिन्हबाट चुनाव लडाएर पार्टीलाई संसदीय व्यवस्थामा फसाउने षडयन्त्र भएपछि त्यसलाई अस्वीकार गरि नयाँ पार्टी गठन गर्नुपरेको बताए । उनले आफ्नो पार्टीको मूल कार्यनीति भनेको वैज्ञानिक समाजवादी क्रान्ति सम्पन्न गर्नु रहेको बताए ।

“महासचिव विप्लव समूहले कतिपय केन्द्रीय सदस्यहरूलाई नै एमालेको चुनाव चिह्न लिएर चुनावमा उठाउने जस्तो संसदवादमा लालायित भएपछि हामीहरूले जनवादी क्रान्ति सम्पन्न गर्ने लक्ष्यलाई निरन्तरता दिँदै नयाँ पार्टी गठन गर्ने निष्कर्षमा पुगेका हौँ”, बास्तोलाले भनेका छन्, “यो पार्टीको मूल कार्यनीति भनेको वैज्ञानिक समाजवादी क्रान्ति सम्पन्न गर्नु हो, त्यसका लागि हामीले समृद्धि र स्वाधीनताको नारालाई अघि सारेका छौँ, केपी ओली, प्रचण्डहरूले लिएको बाटोबाट देशमा जनवादी क्रान्ति सम्पन्न नहुने देखेपछि हामीहरूले बहुमतले विप्लवलाई छोडेर नयाँ पार्टी बनाएका हौँ ।”