हामी सबैकाे संसारन्यूज

काठमाडौं । स्थानीय तह निर्वाचन २०७९ को चुनाव प्रचार प्रसारको आज अन्तिम दिन हो । अन्तिम दिन भएकाले राजनीतिक दलहरुले प्रचार प्रसार कार्यक्रम टुंग्याउने गरि मंगलबार कार्यक्रमहरु आयोजना गरेका छन् ।

अन्तिम दिनलाई ध्यानमा राखेर सबैजसो नेताहरु गृहजिल्लाको चुनावी अभियानमा सरिक भएका छन् । प्रधानमन्त्रीसमेत रहेका कांग्रेस सभापति शेरबहादुर देउवा गृहजिल्ला डडेल्धुरामा छन् । उनले आज डडेल्धुरामा हुने चुनावी सभालाई सम्बोधन गर्दैछन् । देउवाले सोमबार धनगढीको सभालाई सम्बोधन गरेका थिए ।

सोमबारसम्म भएका चुनावी कार्यक्रमहरुमा देउवा र गठबन्धनका अर्का नेता पुष्पकमल दाहाल ‘प्रचण्ड’ सँगै थिए । प्रचण्ड मंगलबारदेखि आज मधेशका चुनावी अभियानमा सहभागि हुँदैछन् ।

प्रचण्डले मंगलबार बारा, सर्लाही, महोत्तरी र रौतहटका विभिन्न सभालाई सम्बोधन गर्ने कार्यक्रम छन् । कतिपय मधेशका कार्यक्रममा प्रचण्डसँगै नेता माधवकुमार नेपाल पनि सहभागि हुने कार्यक्रम रहेको बताइएको छ । रौतहटको कार्यक्रममा प्रचण्ड र माधव नेपाल सँगै रहनेछन् । माधव नेपालले मधेशको कार्यक्रम सकाएर आज नै काठमाडौं र ललितपुरमा आयोजित कार्यक्रममा पनि सहभागि हुने कार्यक्रम छ ।

एमाले अध्यक्ष केपी शर्मा ओली सोमबार नै आफ्नो गृहजिल्ला झापा पुगेका थिए । ओलीका प्रेस विज्ञ रामशरण बजगाईँले बताएअनुसार झापाको कार्यक्रम सकेर ओली मंगलबार नै काठमाडौं आइपुग्नेछन् । ओलीले काठमाडौं भृकुटीमण्डपमा आयोजना हुने सभालाई सम्बोधन गर्ने कार्यक्रम छ ।

जसपाका अध्यक्ष उपेन्द्र यादव चुनाव सुरु भएदेखि नै मधेश केन्द्रीत कार्यक्रममा छन् । यादवको सचिवालयले जनाएअनुसार यादव मंगलबार सुनसरी, रौतहट र मोरङका कार्यक्रममा सहभागि हुनेछन् ।

राप्रपाका अध्यक्ष राजेन्द्र लिङ्देन झापा सोमबारदेखि नै झापामा छन् । उनी मंगलबार झापाका विभिन्न स्थानमा आयोजना हुने चुनावी अभियानमा सहभागि हुनेछन् । लिङ्देन भोट हालेर मात्रै काठमाडौं फर्किनेछन् ।