हामी सबैकाे संसारन्यूज

काठमाडौं । सिटिजन लाइफ इन्स्योरेन्स कम्पनी लिमिटेड ले प्रतिनिधि सभा निर्वाचन २०८२ मा निर्वाचित आफ्ना ‘सिटिजन लिडर्स’ सांसदलाई सम्मान तथा शुभकामना व्यक्त गरेको छ ।

कम्पनीको केन्द्रीय कार्यालय थापाथलीमा आयोजित शुभकामना आदान–प्रदान कार्यक्रममा भक्तपुर क्षेत्र नं. १ बाट निर्वाचित रुकेश रञ्जित तथा समानुपातिकतर्फकी सांसद प्रमिला कुलुजु लाई खादा, पुष्पगुच्छा तथा सम्मानपत्र प्रदान गरिएको थियो ।

कार्यक्रममा करिब ६० जना अभिकर्ता, शाखा कर्मचारी तथा उच्च व्यवस्थापन टोलीको उपस्थिति रहेको थियो ।

कार्यक्रमलाई सम्बोधन गर्दै सांसद कुलुजुले सिटिजन लाइफसँगको यात्राले नेतृत्व विकास र टिम निर्माणमा महत्वपूर्ण भूमिका खेलेको बताइन् । उनले यही अनुभवले आफूलाई वर्तमान उपलब्धिसम्म पुग्न सहयोग गरेको उल्लेख गरिन् ।

त्यस्तै सांसद रञ्जितले बीमा क्षेत्रका चुनौती तथा कर प्रणालीसम्बन्धी विषय संसदमा प्राथमिकताका साथ उठाउने प्रतिबद्धता जनाए । उनले बीमा क्षेत्रको सुदृढीकरण र जनविश्वास अभिवृद्धिका लागि आवश्यक पहल गर्ने बताए ।

कम्पनीका प्रमुख बजार व्यवस्थापन अधिकृत भुषण रिमालले अभिकर्ता नीति निर्माण तहसम्म पुग्नु कम्पनीको सशक्त मानव संसाधन विकासको उदाहरण भएको बताए । प्रमुख कार्यकारी अधिकृत पोषक राज पौडेलले नव–निर्वाचित सांसदहरूको योगदानले बीमा क्षेत्रको विकासमा सकारात्मक प्रभाव पार्ने विश्वास व्यक्त गरे ।

कम्पनीले आफ्ना अभिकर्ताको क्षमता अभिवृद्धि, नेतृत्व विकास तथा सामाजिक योगदानलाई प्राथमिकतामा राख्दै आएको जनाएको छ ।