हामी सबैकाे संसारन्यूज

काठमाडौं । नेपाली काँग्रेसका नेता चन्द्र भण्डारीले नयाँ पुस्तालाई जीवन, नेतृत्व र सफलताबारे महत्त्वपूर्ण सन्देश दिँदै एकैपटक धेरै लक्ष्य पछ्याउँदा सफलता भन्दा समस्या बढ्ने बताएका छन्।

सामाजिक सञ्जाल फेसबुकमार्फत आफ्नो धारणा सार्वजनिक गर्दै भण्डारीले कम्प्युटरको उदाहरण प्रस्तुत गर्दै जीवन र नेतृत्वमा पनि प्राथमिकता निर्धारणको महत्त्व औँल्याएका हुन्।

उनले लेखेका छन्, “कम्प्युटर चलाउन सिकिरहेका नयाँले बुझ्नुपर्छ— एकै पटक धेरै प्रोग्राम, ब्राउजर ट्याब र एप्स खोल्दा कम्प्युटर ह्याङ हुन्छ, ढिलो हुन्छ र अन्ततः कामै रोकिन्छ।”

भण्डारीका अनुसार जीवन र नेतृत्व पनि यही सिद्धान्तमा चल्छ। एकैचोटि सबै काम सम्पन्न गर्ने प्रयास गर्दा मानिसको सोच, समय र ऊर्जा अत्यधिक दबाबमा पर्ने भएकाले अपेक्षित परिणाम प्राप्त हुन नसक्ने उनको भनाइ छ।

उनले “एकैचोटि सबै काम गर्छु भन्ने सोचले दिमाग र ऊर्जा दुवै ओभरलोड हुन्छन्। त्यसले न गति दिन्छ, न परिणाम,” भन्दै सफलताको वास्तविक सूत्र भनेको प्राथमिकता छुट्याएर योजनाबद्ध रूपमा अघि बढ्नु रहेको उल्लेख गरेका छन्।