Sansar News
काठमाडौं । नेकपा (माओवादी केन्द्र) की नेतृ तथा सांसद अमृता थापाले सुन्दरी प्रतियोगिता रोक्नुपर्ने माग गरेकी छन् ।
संसदको महिला तथा सामाजिक समितिको बैठकमा महिला हिंसा र बलात्कारजन्य अपराधमा हदम्याद सम्बन्धी विषयमा गरिएको छलफलमा सांसद थापाले यस्तो माग गरेकी हुन् ।
थापाले सुन्दरी प्रतियोगिता नगर्दा राज्यलाई कति घाटा पर्छ भन्ने प्रश्न गर्दै थापाले विगतमा पनि आफुहरुले सुन्दरी प्रतियोगिता रोक्नुपर्ने माग राखेको बताइन् ।
‘बिगतमा पनि हामीले सुन्दरी प्रतियोगिताको विषयमा गम्भीर भएर राज्यले सोच्नुपर्ने भनी आवाज उठाएका हौं, सुन्दरी प्रतियोगिता राज्यको हितका लागि छैन भने यसलाई रोक्न सक्नुपर्छ ।’ सांसद थापाले भनिन् ।
सांसद थापाले जवरजस्ती करणी सम्बन्धी घटनामा उजुरी दिनका लागि कानुनमा एकवर्षे हदम्याद राखिएकोमा त्यो हटाएर महिला हिंसा र हिंसाजन्य घटना वा बलात्कार जस्तो गम्भीर मानवता विरोधी कार्यमा हदम्याद नलाग्ने गरि ऐन बनाउनुपर्ने माग समेत गरिन् ।
त्यस्तै सांसद तथा नेपाली कांग्रेसकी नेतृ पुष्पा भुसालले पनि कानुनमै हदम्याद राख्ने कुरालाई तत्काल हटाउन माग गरेकी थिइन् ।
‘मानवता विरोधी कार्य हो बलात्कार, यसमा हदम्याद राखियो भने एक वर्षपछि फेरि अपराध गर्न सक्छ । अपराधमा कुनै हदसम्म राखिनुहुन्न’, भु्सालले भनिन् ।
जवरजस्ती करणी सम्बन्धी कानुनमा भएको हदम्यादका कारण धेरै युवतीहरुले न्याय पाउन समस्या परेको भन्दै सडकदेखि सदनसम्म कानुनमा भएको हदम्याद हटाउनुपर्ने भन्दै आवाज उठिरहेका छन् ।
वि.सं.२०७९ जेठ ९ सोमवार १३:५४ मा प्रकाशित
