Sansar News
काठमाडौँ । पूर्वप्रधानमन्त्री तथा नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले हेटौँडा कपडा उद्योग पुनः सञ्चालनमा ल्याउने सरकारको तयारीप्रति खुसी व्यक्त गरेका छन्।
सामाजिक सञ्जालमार्फत प्रतिक्रिया दिँदै प्रचण्डले हेटौँडा कपडा उद्योग सञ्चालनमा आए कपडा उपभोगमा रहेको नेपालको आयातनिर्भरता घट्नुका साथै राष्ट्रिय अर्थतन्त्रमा समेत महत्वपूर्ण योगदान पुग्ने विश्वास व्यक्त गरेका छन्।
प्रचण्डका अनुसार आफू प्रधानमन्त्री हुँदा हेटौँडा कपडा उद्योगको सम्भाव्यता अध्ययन तथा प्रतिवेदन तयार गरी पुनः सञ्चालनका लागि गृहकार्य अघि बढाइएको थियो। त्यसैका आधारमा आर्थिक वर्ष २०८१/८२ को नीति तथा कार्यक्रममा हेटौँडा कपडा उद्योगसहित गोरखकाली रबर उद्योग, विराटनगर जुट मिल र बुटवल धागो कारखानालगायतका सार्वजनिक उद्योग पुनः सञ्चालन गर्ने विषय समेटिएको उनले उल्लेख गरेका छन्।
उनले भनेका छन् “मैले सरकारको नेतृत्व गर्दा हेटौँडा कपडा उद्योगको सम्भाव्यता अध्ययन तथा प्रतिवेदन तयार भएको थियो। त्यसैका आधारमा आर्थिक वर्ष २०८१/८२ को नीति तथा कार्यक्रममा हेटौँडा कपडा उद्योग, गोरखकाली रबर उद्योग, विराटनगर जुट मिल र बुटवल धागो कारखानालगायतका उद्योग पुनः सञ्चालन गर्ने विषय अघि बढाइएको विदितै छ।”
उनले आफू सरकारबाट बाहिरिएपछि रोकिएको प्रक्रिया पुनः अघि बढ्नु सकारात्मक भएको बताएका छन्।
‘सघन गृहकार्य गरेर अघि सारिए पनि सरकारबाट बाहिरिएसँगै रोकिएको यो प्रक्रिया पुनः अघि बढ्नु सुखद कुरा हो। हेटौँडा कपडा उद्योगसँगै सम्भावना भएका अन्य सार्वजनिक उद्योगहरूलाई पनि आधुनिक प्रविधि, व्यावसायिक व्यवस्थापन र स्पष्ट कार्ययोजनासहित पुनः सञ्चालनमा ल्याउन सके आत्मनिर्भर अर्थतन्त्र निर्माणको दिशामा नेपालले ठूलो फड्को मार्न सक्छ।’ उनले विश्वास व्यत्त् गरेका छन् ।
प्रचण्डले हेटौँडा कपडा उद्योगसँगै सम्भावना भएका अन्य सार्वजनिक उद्योगलाई पनि आधुनिक प्रविधि, व्यावसायिक व्यवस्थापन र स्पष्ट कार्ययोजनासहित पुनः सञ्चालन गर्नुपर्नेमा जोड दिएका छन्।
यस्ता उद्योगको पुनरुत्थानले देशमा उत्पादन वृद्धि, आयात प्रतिस्थापन र रोजगारी सिर्जनामा योगदान पुर्याउने उनको भनाइ छ।
उनले सरकारलाई उद्योग पुनः सञ्चालनको प्रक्रियालाई प्रभावकारी र परिणाममुखी ढंगले अघि बढाउन आग्रहसमेत गरेका छन्।
वि.सं.२०८३ साउन २५ सोमवार १९:४६ मा प्रकाशित
