हामी सबैकाे संसारन्यूज

काठमाडौं । सरकारले तारा एयरको विमान दुर्घटनाको छानबिन गर्न पाँच सदस्यीय आयोग गठन गरेको छ । संस्कृति, पर्यटन तथा नागरिक उड्डय मन्त्रालयले वरिष्ठ एरोनटिकल इन्जिनियर रतिशचन्द्र लाल सुमनको नेतृत्वको आयोग गठन गरेको हो ।

लाल सुमनको नेतृत्वको गठित आयोगमा क्याप्टेन दिपु ज्वार्चन, वरिष्ठ मेन्टिनेन्स इन्जिनियर उपेन्द्र लाल श्रेष्ठ, वरिष्ठ मौसमविद मणिरत्न शाक्य र मन्त्रालयका प्राविधिक सहसचिव वुद्धिसागर लामिछाने रहेको मन्त्रालयले जारी गरेको विज्ञप्तिमा छ । मन्त्रालयले छानबिन समितिलाई छानबिनको समय भने तोकेको छैन ।

आइतबार पोखराबाट जोमसोम जाँदै गरेको तारा एयरको ट्वीनअटर विमान मुस्ताङको मानापाथी पहाडमा दुर्घटनामा परेको थियो । दुर्घटनामा पर्दा चालक दलका सदस्यसहित २२ जनाको ज्यान गएको छ ।